“Yuqori To‘palang” tabiat bog‘i xodimlari ozuqa qidirayotgan qo‘ng‘ir ayiqni tasvirga oldi (video)

Surxondaryodagi “Yuqori To‘palang” tabiat bog‘i xodimlari qo‘ng‘ir ayiqni tasvirga oldi. Bu haqda viloyat Ekologiya boshqarmasi axborot xizmati xabar berdi.

Unga ko‘ra, milliy tabiat bog‘ida nazorat ishlarini olib borayotgan davlat inspektorlari ozuqa qidirayotgan qo‘ng‘ir ayiqni tasvirga tushirdi. Qo‘ng‘ir ayiqlar, asosan, Osiyo, Yevropa va Shimoliy Amerika hududlarida uchraydi. 

Qo‘ng‘ir ayiqlar qishning uzoq davom etishiga qarab 7 oygacha uyquga ketishi mumkin. Mamlakatda ayiqlar issiq iqlim sharoitida erta bahordan harakatga kela boshlaydi. O‘zbekiston Qizil kitobiga kiritilgan ushbu noyob jonivorlar “Yuqori To‘palang” milliy tabiat bog‘ida 12 boshi uchrashi aniqlangan.