G‘arb Rossiya tarkibidagi shimoliy Kavkaz mintaqasida beqarorlik keltirib chiqarishga qaratilgan urinishlarini davom ettirmoqda. 2023-yilning oktyabr oyida Rossiya janubidagi Dog‘iston Respublikasi markazi Maxachqalʼadagi aeroportda sodir bo‘lgan va aeroport faoliyatining to‘xtashiga olib kelgan ommaviy tartibsizliklar G‘arbning Shimoliy Kavkazdagi vaziyatni o‘zgartirishga urinishlarining yorqin misoli bo‘lgan. Rossiya Xavfsizlik kengashi kotibi Nikolay Patrushev ushbu bayonotni eʼlon qildi. Bu haqda TASS nashri xabar berdi.
“G‘arbning Shimoliy Kavkazdagi vaziyatni beqarorlashtirishga urinishlari davom etmoqda. O‘tgan oktyabr oyida Dog‘istonda sodir bo‘lgan voqealar, xorijdan kelayotgan provokatsiyalar, internet xurujlari natijasida ommaviy tartibsizliklar sodir bo‘lgan va bu aeroportlar faoliyatining to‘xtashiga olib kelgani bunga yorqin misoldir. Huquq-tartibot idoralari va hokimiyat organlarining tezkor harakatlari tufayli vaziyat barqarorlashgan”, — degan Rossiya vakili.
Xavfsizlik xizmati kotibi ,shuningdek, Ingushetiyaning Qorabuloq shaharchasida ISHID terrorchilik mafkurasi tarafdorlari tomonidan uyushtirilishi rejalashtirilgan hujum haqida maʼlumot bergan. Xavfsizlik xizmatlarining tez va samarali ishlashi tufayli terakt oldi olingan. Jinoyatchi guruhga xorijdan yordam berilgani haqida xabar qilingan.
Nikolay Patrushev o‘z bayonotida Rossiya prezidenti Vladimir Putinning tashqaridan har qanday aralashuv, millatlararo yoki dinlararo mojarolarni keltirib chiqarishga qaratilgan provokatsiyalar Rossiyaga qarshi tajovuzkor harakatlar sifatida baholanishi va unga qarshi keskin javob qaytarilishi haqidagi ogohlantirishini takrorlab o‘tgan. Rossiyaning har qanday tashqi xavfga qarshi kurashish salohiyati yuksak darajada ekanligi taʼkidlangan.
Izoh (0)