Ғарб Россия таркибидаги шимолий Кавказ минтақасида беқарорлик келтириб чиқаришга қаратилган уринишларини давом эттирмоқда. 2023 йилнинг октябрь ойида Россия жанубидаги Доғистон Республикаси маркази Махачқалъадаги аэропортда содир бўлган ва аэропорт фаолиятининг тўхташига олиб келган оммавий тартибсизликлар Ғарбнинг Шимолий Кавказдаги вазиятни ўзгартиришга уринишларининг ёрқин мисоли бўлган. Россия Хавфсизлик кенгаши котиби Николай Патрушев ушбу баёнотни эълон қилди. Бу ҳақда ТАСС нашри хабар берди.
“Ғарбнинг Шимолий Кавказдаги вазиятни беқарорлаштиришга уринишлари давом этмоқда. Ўтган октябрь ойида Доғистонда содир бўлган воқеалар, хориждан келаётган провокациялар, интернет хуружлари натижасида оммавий тартибсизликлар содир бўлган ва бу аэропортлар фаолиятининг тўхташига олиб келгани бунга ёрқин мисолдир. Ҳуқуқ-тартибот идоралари ва ҳокимият органларининг тезкор ҳаракатлари туфайли вазият барқарорлашган”, — деган Россия вакили.
Хавфсизлик хизмати котиби ,шунингдек, Ингушетиянинг Қорабулоқ шаҳарчасида ИШИД террорчилик мафкураси тарафдорлари томонидан уюштирилиши режалаштирилган ҳужум ҳақида маълумот берган. Хавфсизлик хизматларининг тез ва самарали ишлаши туфайли теракт олди олинган. Жиноятчи гуруҳга хориждан ёрдам берилгани ҳақида хабар қилинган.
Николай Патрушев ўз баёнотида Россия президенти Владимир Путиннинг ташқаридан ҳар қандай аралашув, миллатлараро ёки динлараро можароларни келтириб чиқаришга қаратилган провокациялар Россияга қарши тажовузкор ҳаракатлар сифатида баҳоланиши ва унга қарши кескин жавоб қайтарилиши ҳақидаги огоҳлантиришини такрорлаб ўтган. Россиянинг ҳар қандай ташқи хавфга қарши курашиш салоҳияти юксак даражада эканлиги таъкидланган.
Изоҳ (0)