Samarqand viloyati hokimligida 20—29-fevral kunlari oralig‘ida sodir bo‘lgan go‘daklar o‘limi bilan bog‘liq holatlar muhokama qilindi. Bu haqda viloyat hokimligi matbuot xizmati xabar berdi.
Qayd etilishicha, hisobot davrida viloyatda jami 4 nafar go‘dak vafot etgan — Oqdaryo tumanida 2 nafar, Nurobod va Urgut tumanlarida 1 nafardan.
Viloyat sog‘liqni saqlash boshqarmasi, tibbiyot birlashmalari rahbarlari, oilaviy shifokorlar, patronaj va doya hamshiralarning holatlar bo‘yicha hisoboti eshitilgan.
Prokuratura organlari tomonidan tibbiyot xodimlarining qo‘ygan tashxislari va go‘daklar o‘lim sabablari, masʼullarning harakati yoxud harakatsizligi masalalari o‘rganilayotgani va tez kunda yakuniy xulosa eʼlon qilinishi maʼlum qilingan.
Muhokama yakunida masʼullarga xorijdan mutaxassislarni olib kelib, eng avvalo, ona va go‘dak o‘limi yuqori bo‘lgan hududlar tibbiyot xodimlarini reproduktiv salomatlik va homiladorlar parvarishi bo‘yicha o‘qitish, tug‘uruqxonalarni zamonaviy tibbiy uskunalar bilan jihozlash bo‘yicha topshiriqlar berilgan.
Yanvar o‘rtalarida Namanganda to‘rt egizak homilasi bo‘lgan 21 yoshli ayol vafot etgani to‘g‘risida xabar berilgandi.
Izoh (0)