O‘zbekistonda 101 yildan beri chop etib kelinayotgan “Mushtum” jurnalining faoliyati to‘xtatildi. Bu haqda jurnalning Telegram kanalida rasmiy xabar berildi.
Maʼlum qilinishicha, jurnal yopilishiga iqtisodiy qiyinchiliklar sabab bo‘lgan. Shu bois uning ijtimoiy tarmoqlardagi sahifalari vaqtincha faol bo‘lmaydi.
Jurnal yopilishi haqida xabar berilgach, ijtimoiy tarmoqlar faollari o‘z munosabatlarini bildirmoqda. Xususan, iqtisodchi Otabek Bakirov X ijtimoiy tarmog‘ida “Mushtum” faoliyati to‘xtatilganiga ishora qilib, “Qodiriy otilganda ham yopilmagandi”, deya yozib qoldirdi.
Bloger Shahnoza Soatova Facebook’da Abdulla Qodiriydan meros nashrni davlat muhofazasiga olishi kerakligi haqida yozdi.
Yangi nashrlar ochgan yaxshi-yu, biroq eskilarini boy bersak, jadid bobolar g‘oyalariga ehtirom qayda qoladi? “Mushtum” — bizning moddiy-nomoddiy qadriyatimiz, Abdulla Qodiriydan meros nashr. Yuz yillik brend desak ham bo‘ladi. Uni davlat muhofazasiga olish kerak. Xuddi shunday, “Turkiston”, “O‘zbekiston adabiyoti va sanʼati”, “Guliston”, “Yosh kuch” kabi otaxon nashrlarni ham asrab qolish kerak. Yangi nashrlar o‘z tarixini noldan boshlab, yangi O‘zbekistonning merosi bo‘lib qolaversin. Eskilarga tegmaylik, asraylik. Chunki tarixda nafaqat “yangi” bo‘lib, balki “buzmagan, asragan va avlodlarga yetkazgan” bo‘lib qolish ham muhim, — deya fikr bildirgan u.
Telegram tarmog‘idagi “Masofatalim” kanalida ham “Mushtum” jurnali yopilishi borasida munosabat bildirildi.
Bir dumalab dunyoga kelgan har xil qalang‘i-qasang‘i ayrim jurnallar yo‘lini topib, tirikchiligini qilyapti. Ammo biz ulug‘laydigan, jadidlarimiz asos solgan “Mushtum” jurnali esa iqtisodiy qiyinchiliklardan chiqa olmayapti. Shu sabab faoliyatini to‘xtatish darajasigacha keldi. Abdulla Qodiriyni ulug‘lashni, buning ortidan “ochko” ishlashni bilamiz. Ammo u asos solgan ishlarga befarqmiz. Tomoshabinmiz. Bir tiyinga qimmat har xil gazeta va jurnallarni moliyalashtirib, yashatib kelayotgan idoralar bu vaziyatga eʼtibor berishi lozim. “Mushtum” jurnali yashashi kerak”, — deb yozilgan kanalda.
Maʼlumot uchun, “Mushtum” davlat va jamiyat muammolarini hajv yo‘li bilan yoritadigan jurnal bo‘lib, unga taniqli yozuvchi Abdulla Qodiriy va dramaturg G‘ozi Yunus asos solgan. Jurnal ilk bor 1923-yil 18-fevralda chop etilgan. “Mushtum” karikaturalari, felyeton, pamflet va hajviya janrlaridagi materiallari bilan mashhur.
Avvalroq AQSHning O‘zbekistondagi elchisi Jonatan Henik “Mushtum” jurnalini 100 yillik yubileyi bilan tabriklash maqsadida nashr tahririyatiga borgani xabar qilingandi.
Izoh (0)