“Қодирий отилгандаям ёпилмаганди”. “Муштум” журнали фаолиятини тўхтатгани маълум қилинди

Ўзбекистонда 101 йилдан бери чоп этиб келинаётган “Муштум” журналининг фаолияти тўхтатилди. Бу ҳақда журналнинг Telegram каналида расмий хабар берилди.

Маълум қилинишича, журнал ёпилишига иқтисодий қийинчиликлар сабаб бўлган. Шу боис унинг ижтимоий тармоқлардаги саҳифалари вақтинча фаол бўлмайди. 

Журнал ёпилиши ҳақида хабар берилгач, ижтимоий тармоқлар фаоллари ўз муносабатларини билдирмоқда. Хусусан, иқтисодчи Отабек Бакиров Х ижтимоий тармоғида “Муштум” фаолияти тўхтатилганига ишора қилиб, “Қодирий отилганда ҳам ёпилмаганди”, дея ёзиб қолдирди.

Блогер Шаҳноза Соатова Facebook’да Абдулла Қодирийдан мерос нашрни давлат муҳофазасига олиши кераклиги ҳақида ёзди.

Янги нашрлар очган яхши-ю, бироқ эскиларини бой берсак, жадид боболар ғояларига эҳтиром қайда қолади? “Муштум” — бизнинг моддий-номоддий қадриятимиз, Абдулла Қодирийдан мерос нашр. Юз йиллик бренд десак ҳам бўлади. Уни давлат муҳофазасига олиш керак. Худди шундай, “Туркистон”, “Ўзбекистон адабиёти ва санъати”, “Гулистон”, “Ёш куч” каби отахон нашрларни ҳам асраб қолиш керак. Янги нашрлар ўз тарихини нолдан бошлаб, янги Ўзбекистоннинг мероси бўлиб қолаверсин. Эскиларга тегмайлик, асрайлик. Чунки тарихда нафақат “янги” бўлиб, балки “бузмаган, асраган ва авлодларга етказган” бўлиб қолиш ҳам муҳим, — дея фикр билдирган у.

Telegram тармоғидаги “Масофаталим” каналида ҳам “Муштум” журнали ёпилиши борасида муносабат билдирилди.

Бир думалаб дунёга келган ҳар хил қаланғи-қасанғи айрим журналлар йўлини топиб, тирикчилигини қиляпти. Аммо биз улуғлайдиган, жадидларимиз асос солган “Муштум” журнали эса иқтисодий қийинчиликлардан чиқа олмаяпти. Шу сабаб фаолиятини тўхтатиш даражасигача келди. Абдулла Қодирийни улуғлашни, бунинг ортидан “очко” ишлашни биламиз. Аммо у асос солган ишларга бефарқмиз. Томошабинмиз. Бир тийинга қиммат ҳар хил газета ва журналларни молиялаштириб, яшатиб келаётган идоралар бу вазиятга эътибор бериши лозим. “Муштум” журнали яшаши керак”, — деб ёзилган каналда.

Маълумот учун, “Муштум” давлат ва жамият муаммоларини ҳажв йўли билан ёритадиган журнал бўлиб, унга таниқли ёзувчи Абдулла Қодирий ва драматург Ғози Юнус асос солган. Журнал илк бор 1923 йил 18 февралда чоп этилган. “Муштум” карикатуралари, фелетон, памфлет ва ҳажвия жанрларидаги материаллари билан машҳур.

Аввалроқ АҚШнинг Ўзбекистондаги элчиси Жонатан Ҳеник “Муштум” журналини 100 йиллик юбилейи билан табриклаш мақсадида нашр таҳририятига боргани хабар қилинганди.