AQSHning O‘zbekistondagi elchisi Jonatan Henik “Mushtum” jurnalini 100-yillik yubiley bilan tabriklash maqsadida nashr tahririyatiga bordi. Bu haqda jurnal va elchixonaning Telegram kanallarida xabar berildi.
Amerika Qo‘shma Shtatlarining O‘zbekistondagi favqulodda va muxtor elchisi Jonatan Xenik 1-may kuni “Mushtum” jurnali tahririyatiga jamoani jurnalning 100-yillik yubileyi bilan tabriklash uchun tashrif buyurdi.
“Elchi janoblari elchixona jurnalga obuna bo‘lganini, ‘Mushtum’ning muxlisi ekanligini, uning har bir sonini muntazam o‘qib borishini taʼkidlab o‘tdi. Shuningdek, u xodimlar, ish jarayoni va nashr tarixi bilan tanishdi. Jurnalning qutlug‘ yoshi bilan elchixona nomidan tabrikladi va sovg‘alar topshirdi”, — deyiladi jurnal xabarida.
AQSHning O‘zbekistondagi elchixonasi bergan xabarda elchi jurnal tahririyatiga Jahon matbuot erkinligi kuni munosabati bilan tashrif buyurgani haqida so‘z borgan.
“Elchi Henik ‘worldpressfreedomday’ arafasida nashr etilganining 100 yilligini nishonlash va O‘zbekistonda ommaviy axborot vositalari erkinligini qo‘llab-quvvatlash maqsadida buyuk o‘zbek yozuvchisi Abdulla Qodiriy asos solgan va boshqa jadidlar ijodidan namunalar bosilgan ‘Mushtum’ jurnali tahririyatiga tashrif buyurdi. Bosh muharrir Nosirjon Toshmatov, bir guruh taniqli rassomlar va tahririyat aʼzolari elchiga ajoyib karikaturalarni namoyish etishdi hamda siyosiy va iqtisodiy mavzularni yoritishda jurnalning satira va yumordan foydalanib kelayotgani haqidagi uzoq yillik va muhim tarixidan so‘zlab berishdi”, — deyiladi xabarda.
Maʼlumot uchun, “Mushtum” — davlat va jamiyatdagi muammolarni hajv yo‘li bilan yoritadigan jurnal bo‘lib, unga taniqli yozuvchi Abdulla Qodiriy va dramaturg G‘ozi Yunus asos solgan. Jurnal ilk bor 1923-yil 18-fevralda chop etilgan. “Mushtum” o‘z karikaturalari bilan ham mashhur. Jurnalda o‘zbek adabiyotining yirik nomoyondalari, ko‘plab mashhur shoir hamda yozuvchilar o‘z asarlarini eʼlon qilib kelgan.
Izoh (0)