Argentina prezidenti Xavyer Miley iqtisodiyotni davlat tomonidan tartibga solishni qisqartirishga qaratilgan 366 ta islohotni nazarda tutuvchi farmonni imzoladi, deb xabar bermoqda Argentina telekanali C5N.
Miley 20-dekabr kuni Argentina televideniyesida farmon imzolangani haqida e’lon qildi. Uning aniqlik kiritishicha, islohotlar “mamlakatni vayron qilgan repressiv institutsional huquqiy bazani” o‘zgartirishga qaratilgan. Shuningdek, u yozda qonun loyihalari paketini ko‘rib chiqadigan Kongressning navbatdan tashqari sessiyalarini chaqirishini ma’lum qildi.
Jurnalistlar bilan suhbatda prezident farmonga kiritilgan 366 ta islohotdan atigi 30 tasini sanab o‘tdi. Xususan, Miley davlat kompaniyalarini xususiylashtirishga to‘sqinlik qiluvchi qoidalarni bekor qilmoqchi. Prezident tomonidan taklif etilayotgan islohotlar, iqtisodiyotning turizm va avtomobil sohasi, futbol klublari faoliyatini tartibga solish, yer qonunchiligi, Fuqarolik va tijorat kodekslariga ham taalluqlidir. Bundan tashqari, Xavyer Miley oziq-ovqat do‘konlarida xaridlar va raqobat qonunlarini bekor qilishni taklif qilmoqda.
Avvalroq Argentina Iqtisodiyot vaziri Luis Kaputo prezident Mileyning iqtisodiy islohotlari doirasida milliy valyuta – peso ikki baravardan ortiq devalvatsiya qilinishi va davlat xarajatlari keskin kamayishi haqida ma’lum qilgandi.
Izoh (0)