Quyoshda ikkita X darajali kuchli chaqnash sodir bo‘ldi. Oxirgi marta bunday hodisa 2017-yilda kuzatilgan. Bu haqda Rossiya Fanlar akademiyasi Koinot tadqiqotlari institutining Quyosh astronomiyasi laboratoriyasi “RIA Novosti”ga xabar berdi.
“2024-yil 22-fevral kuni Quyoshda X balli eng yuqori ikkita chaqnash sodir bo‘ldi”, — deyiladi xabarda.
Birinchisi Toshkent vaqti bilan tungi soat 04:17, ikkinchisi esa ertalab soat 11 dan 12 gacha sodir bo‘lgan. Laboratoriya rahbari, professor Sergey Bogachevga ko‘ra, Quyoshda oxirgi marta 2017-yilning sentyabrida ketma-ket ikkita yuqori quvvatli chaqnash kuzatilgan. Bunday hodisalar juda kam uchraydi.
“Yulduzning ketma-ket ikkita shunday kuchli portlashni amalga oshirishga qodirligi Quyoshning nihoyatda yuqori faollik holatiga kirayotganidan dalolat beradi”, — deydi olim.
Uning ta’kidlashicha, dastlabki hisob-kitoblarga ko‘ra, ajralib chiqqan plazma bulutlari juda yaqin masofada bo‘lsa-da, Yerdan o‘tib ketadi.
Quyosh chaqnashlari rentgen nurlanishining kuchiga qarab besh sinfga bo‘linadi: A, B, C, M va X. 2024-yil boshidan beri Quyoshda 5 ta kuchli chaqnash kuzatilgan.
Quyosh chaqnashlari Yerda magnit bo‘ronlarini keltirib chiqarishi mumkin, bu esa o‘z navbatida energiya tizimlarida uzilishlarga olib keladi va qushlar, hayvonlarning migratsiyasiga ham ta’sir ko‘rsatadi. Biroq chaqnash Quyosh-Yer chizig‘idan sezilarli masofada bo‘lsa, u sayyoraga ta’sir qilmaydi.
Izoh (0)