Rossiya Mudofaa vazirligi rus qo‘shinlari Avdeyevkani to‘liq nazoratiga olgani va 8,6 kilometr masofani bosib o‘tganini ma’lum qildi. Bu haqda BBC xabar berdi.
Rossiya harbiylari Avdeyevkada bosib olgan Ukraina hududining umumiy maydonini 31,75 kvadrat kilometr deb baholamoqda. Ukraina harbiylari shahardan olib chiqib ketilgandan so‘ng ruslar Avdeyevkani egallab olganini eʼlon qildi.
Rossiya mudofaa vazir Sergey Shoygu mamlakat rahbari Vladimir Putinga Avdeyevka to‘liq nazoratga olingani haqida xabar bergan. U so‘nggi 24 soat ichida shahar uchun janglarda Ukraina yo‘qotishlari 1,5 ming harbiy xizmatchidan oshganini aytmoqda.
“Rossiya qo‘shinlarining uzluksiz o‘t ochishi ta’siri ostida faqat ukrainalik jangchilarning alohida tarqoq bo‘linmalari qurollari va harbiy texnikalarini tashlab, shoshilinch ravishda Avdeyevkani tark etdi. Hozirda shaharni Ukraina jangchilaridan to‘liq tozalash choralari ko‘rilmoqda”, — deydi u.
17-fevral kuni Ukraina qurolli kuchlari bosh qo‘mondoni Aleksandr Sirskiy Ukraina qo‘shinlari Rossiyaning bir necha oylik shiddatli hujumlaridan so‘ng qurshovga tushmaslik uchun Avdeyevkadan chekinganini aytdi.
Harbiy xizmatchilarning hayoti birinchi o‘rinda turadi. Biz baribir Avdeyevkani qaytaramiz, — degan Sirskiy.
2024-yil 15-fevralda rus qo‘shinlari Avdeyevkaning asosiy kirish qismini egallab oldi. Keyinroq The Washington Post Ukraina qo‘shinlarini shahardan qisman olib chiqishni boshlagani haqida xabar berdi. 16-fevral kuni Ukraina Qurolli kuchlarining “Tavriya” operativ-strategik guruhi qo‘mondoni Aleksandr Tarnavskiy ham Ukraina qo‘shinlari Avdeyevkadan chekinishini ma’lum qildi.
Izoh (0)