Ukraina harbiylari shiddatli janglar kechayotgan Avdeyevka shahridan qo‘shinlarni qisman olib chiqishni boshladi. Bu haqda ukrain harbiylariga tayanib, The Washington Post xabar berdi.
Harbiylarning so‘zlariga ko‘ra, Avdeyevkani boy berish “vaqt masalasi”. Ukrainaning shahardagi so‘nggi qo‘rg‘oni vayron qilingan koks zavodi bo‘lishi mumkin. Agar Avdeyevka ustidan nazorat yo‘qolsa, rus harbiylari “Ukraina qarshi hujumi muvaffaqiyatsizlikka uchraganidan beri jang maydonidagi eng muhim g‘alabani” qo‘lga kiritadi.
Bu Rossiya kuchlari tashabbusni qayta qo‘lga kiritayotganining eng yorqin belgisiga aylanadi, sababi Ukrainada askarlar, qurol-yarog‘lar, o‘q-dorilar, ruhiy holat va mablag‘ yetarli emas.
Shaharni boy berish haqidagi taxminlar bilan avvalroq Bild tahlilchisi Yulian Ryopke bo‘lishgan edi. U rus qo‘shinlari Avdeyevkada ikki yo‘nalishda (quyida xaritada sariq bilan belgilangan): janubi-sharqda va shahar markazida muvaffaqiyatli olg‘a siljiyotganini aytgan.
Ukraina harbiylari uchun esa vaziyat keskinlashmoqda. Ayniqsa Rossiya armiyasi Ukraina harbiylarining (yashil rang bilan belgilangan) so‘nggi ta’minot yo‘llaridan birida taxminan 200 metr uzoqlikda joylashgani xavfli. Ukraina qurolli kuchlari bilan Rossiya armiyasi pozitsiyalari orasidagi yo‘lakning kengligi 4,85 kilometrgacha qisqargan.
Rossiya qurolli kuchlari artilleriya bo‘yicha Ukraina armiyasidan ustunligi tufayli muvaffaqiyatli oldinga siljimoqda. Hozir taxminan 5:1. Rossiya 152 va 122 mm artilleriya, “Grad” reaktiv tizimi va minomyotlardan faol foydalanadi. Rossiyaning ustunligi havoda ham seziladi. FAB-500, FAB-1000 va FAB-1500 kuchli portlovchi bombalar samolyotdan tashlanadi. Ukrainada bu hujumlarni qaytarish uchun havo hujumidan mudofaa tizimlari mavjud emas.
Izoh (0)