Ukrainaning Avdeyevka shahri uchun shiddatli janglar davom etmoqda. Biroq agar ruslar shaharni egallashga muvaffaq bo‘lgan taqdirda, Ukraina deyarli hech narsa yo‘qotmaydi. Bu haqda harbiy ekspert, “Aydar” batalyonining sobiq rota komandiri Yevgeniy Dikiy “Novinarnya” nashriga ma’lum qildi.
Ekspertning so‘zlariga ko‘ra, Avdeyevka keng ko‘lamli bosqin boshlanganidan beri Rossiya mudofaasi ichida bo‘lgan. Agar Rossiya front chizig‘ini tenglashtira olsa, bu u uchun osonroq bo‘ladi, lekin Ukraina uchun Donetskni o‘qqa tutish qiyinlashadi.
“Avdeyevka ushlab turilgan vaqtda u yerda ikkinchi front chizig‘i paydo bo‘lgandi. Allaqachon orqaga chekinish kerak bo‘lgan joy bor. Avdeyevka tez boy berilgan taqdirda, bu boshqacha bo‘lardi. Chunki negadir 2014-yildan 2023-yilgacha u yerda hech kim ikkinchi yoki uchinchi frontni tashkil qilmagan”, — deya tushuntirdi ekspert.
Dikiyning so‘zlariga ko‘ra, mudofaa chiziqlari allaqachon tayyor, ukrainalik himoyachilar orqaga chekinish uchun joy bor. Baxmutdagi jang paytida sodir bo‘lgan ssenariy kuzatilmaydi. Biroq hozir Avdeyevkani ushlab turish juda foydali.
“Ular (ruslar) Avdeyevkaga 40 ming kishini jalb qilgani biz uchun foydali. Shunday qilib, bu odamlar bizning Kupyansk yaqinidagi mudofaamizni kesib o‘tmaydi, ularni Xerson viloyatiga o‘tkazib bo‘lmaydi. Ular Avdeyevkaga bog‘lanib qolgan, sababi ularning hukumati (Kreml) shaharni bosib olishni buyurgan”, — deydi u.
Mutaxassisning aytishicha, Avdeyevkadagi ukrainalik harbiylar uchun juda qiyin, biroq dushman katta yo‘qotishlarga uchramoqda. Shuning uchun shaharni iloji boricha uzoqroq ushlab turish kerak. Hammasi Orlovkadagi vaziyatga bog‘liq bo‘ladi.
“Avdeyevkani tashqi dunyo bilan bog‘laydigan yagona avtomagistral Orlovka orqali o‘tadi. Bir necha oylardan beri u otishma ostida qolmoqda”, — deya mutaxassis va shaharni ushlab turish texnika tashish uchun zarurligini ta’kidladi.
Izoh (0)