AQSHning BMTdagi sobiq elchisi, Respublikachilar partiyasidan prezidentlikka nomzod bo‘lgan Nikki Xeyli Rossiya aktivlarini musodara qilish va ularni Ukrainaga o‘tkazish haqidagi qonun loyihasini qo‘llab-quvvatladi.
U, shuningdek, saylovoldi poygasidagi raqibi, AQSHning sobiq prezidenti Donald Trampni ham tanqid qildi.
Bloomberg agentligiga bergan intervyusida Nikki Xeyli Rossiya prezidenti Vladimir Putin “o‘z qilmishlari uchun tovon to‘lashi kerak” dedi. Shuningdek, u “NATO masalasida Vladimir Putin tarafini olgan” va “Ukrainadan voz kechishga tayyorligini bildirgan” Donald Tramp har bir amerikalikni xavf ostiga qo‘yishini ta’kidladi.
“Biz doimo urushning oldini olishga e’tibor qaratishimiz kerak. Buni amalga oshirish uchun bizga aqlli prezident kerak”, — deya qo‘shimcha qildi u.
AQSH Senatining tashqi aloqalar qo‘mitasi 24-yanvar kuni Rossiya aktivlarini musodara qilish haqidagi qonun loyihasini qo‘llab-quvvatladi. 20 nafar qo‘mita a’zosi so‘zga chiqib, qonun loyihasini qo‘llab-quvvatladi, bir nafari esa qarshi chiqdi. Rossiyaning musodara qilingan aktivlari, jumladan, Rossiya bankining muzlatilgan mablag‘lari Ukrainaga qo‘shimcha yordam sifatida taqdim etilishi taxmin qilinmoqda.
Qonun kuchga kirishi uchun qonun loyihasi avval Senat, keyin esa Kongress Vakillar palatasi tomonidan ma’qullanishi kerak. Shundan so‘ng hujjat AQSH prezidenti Jo Bayden tomonidan imzolanishi kerak.
Izoh (0)