Irlandiya va Ispaniya Yevropa Ittifoqidan Isroilning G‘azoda inson huquqlarini hurmat qilish bo‘yicha o‘z majburiyatlariga rioya qilayotgani yoki yo‘qligini tekshirishni so‘radi. Ispaniya prezidenti Pedro Sanches 14-fevral kuni bu haqda ijtimoiy tarmoqlarda rasman ma’lum qilgan. Bu haqda CNN xabar bermoqda.
Pedro Sanches va Irlandiya bosh vaziri Leo Varadkar Yevropa komissiyasi rahbariga maktub yo‘llab, komissiyadan Isroil o‘z majburiyatlarini, shu jumladan, Yevropa Ittifoqi va Isroil kelishuvi bo‘yicha unga qo‘yilgan talablarga rioya qilayotgani yoki yo‘qligini ko‘rib chiqishni so‘ragan. Da’vogarlar bu masalani huquqiy va demokratik tamoyillarning asosiy sharti, Isroil va Yevropa Ittifoqi o'rtasidagi munosabatlarning muhim elementi deb biladi.
Ispaniya va Irlandiya yetakchilari Yevropa Ittifoqi rahbari Ursula fon der Lyayyenga “Isroil va G‘azodagi vaziyat yomonlashayotganidan, ayniqsa mojaroning begunoh falastinliklar, bolalar va ayollarga ta’siridan qattiq xavotirda ekanliklari”ni ma’lum qilgan.
Yevropa Ittifoqi rahbariyati ikki mamlakat rahbariyati murojaatini qabul qilganini tasdiqlagan. Ammo Ittifoqda hozircha bu borada kelishilgan reja ishlab chiqilmagani bildirilgan.
Izoh (0)