Yaqinda Afg‘oniston milliy elektr kompaniyasi O‘zbekiston, Tojikiston, Turkmaniston va Erondan import qilgan elektr energiyasi uchun 627 million dollar qarzini to‘lagani xabar qilingandi. Xo‘sh, Afg‘oniston o‘tgan 2023-yil va joriy yilning yanvar oyida O‘zbekistondan qancha hajmda elektr energiyasi sotib oldi?
“Daryo” manbasining maʼlum qilishicha, Afg‘onistonning 2023-yil 1-yanvar holatiga O‘zbekistondan elektr energiyasi bo‘yicha qarzdorligi 4 million 51 ming dollarni tashkil etgan.
O‘tgan yili qo‘shni mamlakatga umumiy qiymati 91 million 176 ming dollarlik, jami hajmi 1 milliard 824 million kVt/soat elektr energiyasi yetkazib berilgan. 2023-yilda Afg‘onistondan elektr eksportidan undirilgan mablag‘ miqdori 93,5 million dollar bo‘lgan.
Hisob-kitoblarga ko‘ra, 2024-yil 1-yanvar holatiga qo‘shni davlatning elektr energiyasidan qarzdorligi 1,7 million dollarni tashkil etgan.
Joriy yil yanvar oyida Afg‘onistonga qiymati 15 million 994 ming dollarlik, jami hajmi 320 million kVt/soat elektr energiyasi yetkazib berilgan. O‘z o‘rnida, o‘tgan oydagi elektr sotuvi bo‘yicha 16 million 458 ming dollar mablag‘ undirilgan.
2024-yil 1-fevral holatiga Afg‘onistonning O‘zbekistondan olgan elektr energiyasi bo‘yicha qarzdorligi 1 million 244 ming dollarni tashkil etmoqda.
Izoh (0)