Яқинда Афғонистон миллий электр компанияси Ўзбекистон, Тожикистон, Туркманистон ва Эрондан импорт қилган электр энергияси учун 627 миллион доллар қарзини тўлагани хабар қилинганди. Хўш, Афғонистон ўтган 2023 йил ва жорий йилнинг январь ойида Ўзбекистондан қанча ҳажмда электр энергияси сотиб олди?
“Дарё” манбасининг маълум қилишича, Афғонистоннинг 2023 йил 1 январь ҳолатига Ўзбекистондан электр энергияси бўйича қарздорлиги 4 миллион 51 минг долларни ташкил этган.
Ўтган йили қўшни мамлакатга умумий қиймати 91 миллион 176 минг долларлик, жами ҳажми 1 миллиард 824 миллион кВт/соат электр энергияси етказиб берилган. 2023 йилда Афғонистондан электр экспортидан ундирилган маблағ миқдори 93,5 миллион доллар бўлган.
Ҳисоб-китобларга кўра, 2024 йил 1 январь ҳолатига қўшни давлатнинг электр энергиясидан қарздорлиги 1,7 миллион долларни ташкил этган.
Жорий йил январь ойида Афғонистонга қиймати 15 миллион 994 минг долларлик, жами ҳажми 320 миллион кВт/соат электр энергияси етказиб берилган. Ўз ўрнида, ўтган ойдаги электр сотуви бўйича 16 миллион 458 минг доллар маблағ ундирилган.
2024 йил 1 февраль ҳолатига Афғонистоннинг Ўзбекистондан олган электр энергияси бўйича қарздорлиги 1 миллион 244 минг долларни ташкил этмоқда.
Изоҳ (0)