Qo‘qon, Buxoro va Bo‘stonliq tumanlarida elektr energiyasidan noqonuniy foydalanilgani aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Uchko‘prik tuman bo‘limi tomonidan o‘tkazilgan tergovga qadar tekshiruvda Qo‘qon shahar “Marg‘ilon” MFY hududidagi xonadonda yashovchi U.X. hech qanday hujjatsiz kompyuter o‘yinlari xizmatini tashkil etib, kompyuterlarni tijorat maqsadida umumiy foydalanishdagi elektr tarmog‘iga ulab, jami 144,7 mln so‘mlik elektr energiyasidan noqonuniy foydalanganligi aniqlangan.
Shu kabi, departamentning Buxoro tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda “Gulshanobod” MFY hududidagi xonadonda yashovchi I.A. o‘z uyida mayning kripto-aktivlari qurilmalarini tijorat maqsadida umumiy foydalanishdagi elektr tarmog‘iga ulab, jami 138,1 mln so‘mlik elektr energiyasidan noqonuniy foydalanganligi aniqlangan.
Xuddi shunday, departamentning Yuqori Chirchiq tuman bo‘limi tomonidan “O‘zenergoinspeksiya” Toshkent viloyat boshqarmasi xodimlari bilan hamkorlikda o‘tkazilgan tergovga qadar tekshiruvda Bo‘stonliq tumani “Qoramanas” MFY hududidagi xonadonda yashovchi N.D. o‘z uyida mayning kripto-aktivlari qurilmasini tijorat maqsadida umumiy foydalanishdagi elektr tarmog‘iga ulab, jami 112,3 mln so‘mlik elektr energiyasidan noqonuniy foydalanganligi aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)