Ukraina Milliy xavfsizlik va mudofaa kengashi kotibi Aleksey Danilov 24-yanvar kuni Belgorodda halokatga uchragan Il-76 bortida ukrainalik harbiy asirlar bo‘lmaganini aytdi. Bu haqda u Babel nashriga bergan intervyusida ma’lum qildi.
“Bizning harbiy asirlarimiz u yerda bo‘lganmidi, sizga aniq yo‘q, deb ayta olaman. Buni Tehrondan keyingi tajribamiz va undan keyin sodir bo‘lgan voqealardan kelib chiqib aytyapman. Agar shunday bo‘lganida, unda biologik moddalar miqdori, aytaylik, o‘liklar sezilarli darajada ko‘p bo‘lar edi”, — dedi Danilov.
2020-yilning 8-yanvar kuni Tehron aeroportidan havoga ko‘tarilgan Ukraina xalqaro aviakompaniyasining Boeing 737-800 samolyoti urib tushirildi. 176 kishi halok bo‘ldi. Tergov shuni ko‘rsatdiki, samolyot Eron havo hujumidan mudofaa tizimi tomonidan yanglishib urib tushirilgan.
Shuningdek, Danilov agar samolyot bortida haqiqatan ham ukrainalik harbiylar bo‘lsa, Rossiya tomoni halok bo‘lganlar tasvirini ko‘rsatmasdan qolmasligini aytdi, ammo hozir uning fikricha, “ko‘rsatishga hech narsa yo‘q”.
Ukraina tomoni, deya qo‘shimcha Danilov, 24-yanvar kuni almashtirilishi kerak bo‘lgan asirlar hali ham tirikmi yoki yo‘qligini bilmaydi.
Belgorodda Il-76 halokati
24-yanvar kuni Rossiyaning Belgorod viloyatida Il-76 samolyoti halokatga uchradi. Rossiya Mudofaa vazirligining da’vo qilishicha, bortda 74 kishi bo‘lgan: 65 nafar ukrainalik harbiy asir, uch nafar rus askari va olti nafar ekipaj a’zosi. Rossiya rasmiylariga ko‘ra, ularning barchasi vafot etgan.
Rossiya Mudofaa vazirligi Il-76 halokatini terakt deb atagan va bunda Ukraina harbiylarini ayblagan. Ukraina hukumati halokat uchun javobgarlikni o‘z zimmasiga olmagan, ammo samolyot halokatida Rossiyani ayblamagan ham. “Ukrainskaya pravda” nashri Ukraina qurolli kuchlaridagi manbalarga tayanib, ruslar Il-76 da Xarkovga tez-tez o‘q uzadigan S-300 havo mudofaa tizimi uchun raketalarni tashiganini ma’lum qilgan.
31-yanvar kuni Putin Il-76 samolyoti Amerika Patriot tizimi tomonidan urib tushirilganini, ekspertiza buni aniqlaganini da’vo qilgan.
Keyinchalik, Ukraina razvedkasi 24-yanvar kuni mahbuslar almashinuvi bo‘lishi kerakligini tasdiqlagan, ammo bu jarayon to‘xtatilgan. Ukraina tomonida Il-76 bortida kim bo‘lgani haqida ishonchli ma’lumotlar yo‘qligini qo‘shimcha qilgan.
O‘z navbatida, Rossiya asirlar qaysi yo‘nalishda, transportda va necha kishi bo‘lgani haqida Ukrainani ogohlantirmagan. Avvalgi asirlar almashinuvida ruslar ukrainlarni bu borada ogohlantirib kelgandi. Ukraina Xavfsizlik xizmati Il-76 samolyotining halokatga uchrashi bo‘yicha tergov boshlagan. Zelenskiy esa Il-76 halokati bo‘yicha xalqaro tergov o‘tkazishni talab qilgan.
Izoh (0)