Rossiya prezidenti Vladimir Putin Belgorodda Il-76 samolyotini Rossiya havo hujumidan mudofaa tizimi urib tushirmagani, sababi hech qanday rus aviatexnikasiga nisbatan bunday holatlar kuzatilmaganini ma’lum qildi. Ukraina razvedkasi Putinning mazkur bayonotiga ishora qilib, Rossiya prezidenti yolg‘on gapirayotganini ma’lum qildi.
“Bu vaziyatda Putinga o‘xshagan shaxsning so‘zlariga kelsak, u har doimgidek ayyorlik qilmoqda. Birinchidan, Rossiya havo mudofaasi va raketaga qarshi mudofaa tizimlari tomonidan rus samolyotlarining urib tushirilishi bir necha bor Rossiyada va bosib olingan hududlarning front chizig‘ida qayd etilgan. Bundan tashqari, agar biz ‘do‘st yoki dushman’ tizimi haqida gapiradigan bo‘lsak, u har doim ham ishlamaydi, Belgoroddagi tizimlarni hisobga olganda esa, bu umuman argument emas”, — dedi Ukraina razvedkasi vakili Andrey Yusov.
Razvedka rasmiysi shu sababli Rossiya prezidentining bayonotlari ko‘proq “bahona” hisoblanishini aytdi. Shuningdek, u BMT Xavfsizlik kengashi yig‘ilishida Rossiya urib tushirilgan samolyot bortida ukrainalik harbiy asirlar borligi haqida hech qanday tafsilot va dalil keltirmaganini ta’kidladi.
“Biz haqiqatan ham ba’zi tashviqot bayonotlari oqimidan tashqari, faktdan iborat ma’lumotlar taqdim etilishini kutgan edik. Biz yangi hech narsa ko‘rmadik, shuning uchun tergov davom etmoqda. Samolyotda bo‘lgan odamlarning taqdiriga kelsak, albatta, buni aniqlash uchun bor kuchimizni sarflashimiz kerak, bu albatta amalga oshiriladi. Ukraina uchun xalqaro tergov mavzusi aniq hal qilinmagan”, — dedi Yusov.
Belgorodda Il-76 halokati
24-yanvar kuni Rossiyaning Belgorod viloyatida Il-76 samolyoti halokatga uchradi. Rossiya Mudofaa vazirligining da’vo qilishicha, bortda 74 kishi bo‘lgan: 65 nafar ukrainalik harbiy asir, uch nafar rus askari va olti nafar ekipaj a’zosi. Rossiya rasmiylariga ko‘ra, ularning barchasi vafot etgan.
Rossiya Mudofaa vazirligi Il-76 halokatini terakt deb atadi va bunda Ukraina harbiylarini aybladi. Ukraina hukumati halokat uchun javobgarlikni o‘z zimmasiga olmadi, ammo samolyot halokatida Rossiyani ayblamadi ham. “Ukrainskaya pravda” nashri Ukraina Qurolli kuchlaridagi manbalarga tayanib, ruslar Il-76 da Xarkovga tez-tez o‘q uzadigan S-300 havo mudofaa tizimi uchun raketalarni tashiganini ma’lum qildi.
Keyinchalik, Ukraina razvedkasi 24-yanvar kuni mahbuslar almashinuvi bo‘lishi kerakligini tasdiqladi, ammo bu jarayon to‘xtatildi. Ukraina tomonida Il-76 bortida kim bo‘lgani haqida ishonchli ma’lumotlar yo‘qligini qo‘shimcha qildi. Rossiya aviahalokat paytida halok bo‘lgan 65 nafar ukrainalik asirlar ro‘yxatini e’lon qildi. Biroq ukrainalik jurnalistlarga ko‘ra, ro‘yxatdagi kamida 17 kishi 3-yanvar kuni asirlar almashinuvi doirasida vataniga qaytgan.
O‘z navbatida, Rossiya asirlar qaysi yo‘nalishda, transportda va necha kishi bo‘lgani haqida Ukrainani ogohlantirmagan. Avvalgi asirlar almashinuvida ruslar ukrainlarni bu borada ogohlantirib kelgandi. Ukraina Xavfsizlik xizmati Il-76 samolyotining halokatga uchrashi bo‘yicha tergov boshlagan.
Izoh (0)