Qashqadaryoda traktori noqonuniy olib qo‘yilgan fermerga MIBdan 355 million so‘m kompensatsiya undirilishi haqida xabar berilgan edi. MIB matbuot xizmati kompensatsiya undiruvi haqidagi qaror hali kuchga kirmaganini “Daryo”ga ma’lum qildi.
MIB munosabatida aytilishicha, Qashqadaryo viloyat davlat soliq boshqarmasining 2021-yil 27-dekabrdagi qaroriga asosan qarzdor “Samandar Nur” fermer xo‘jaligidan davlat foydasiga 5 ta ijro hujjati bo‘yicha jami 42 million 440 ming 589 so‘m soliq qarzini undirish belgilangan.
Biroq, qarzdor tomonidan ijro hujjatida ko‘rsatilgan talablar byuroning Nishon tuman bo‘limi davlat ijrochisi tomonidan berilgan ixtiyoriy muddatlarda bartaraf etilmagani sababli, “Sud hujjatlari va boshqa organlar hujjatlarini ijro etish” to‘g‘risidagi qonun talablariga asosan, fermer xo‘jaligi balansidagi agrotexnika vositasi xatlanib, ro‘yxatga olingan va tegishli dalolatnoma rasmiylashtirilgan holda vaqtincha saqlash uchun Nishon tuman IIB Yo‘l harakati xavfsizligi boshqarmasining jarima maydonchasiga joylashtirilgan.
Ijtimoiy tarmoqlarda fermer xo‘jaligi foydasiga 355 million so‘m kompensatsiya to‘lab berilganligi yuzasidan tarqatilgan xabarlar asossiz hisoblanadi. Sababi, Qarshi tumanlararo iqtisodiy sudi tomonidan chiqarilgan hal qiluv qarori qonuniy kuchga kirgan emas, — deyiladi munosabatda.
Qayd etilishicha, byuroning Qashqadaryo viloyat boshqarmasi tomonidan sudning mazkur holat yuzasidan chiqargan hal qiluv qaroriga nisbatan apellyatsiya shikoyatini berish choralari ko‘rilmoqda.
Izoh (0)