Toshkentda piyodalarga xalal berayotgan noqonuniy qurilma va inshootlar demontaj qilinadi

Toshkent shahar hokimligi piyodalarga xalaqit berayotgan noqonuniy qurilma va inshootlarni demontaj qilish ishlari boshlanayotganini e’lon qildi.

Qayd etilishicha, ayni paytda poytaxtda aholi farovonligini oshirish, jumladan, kommunal va yo‘l infratuzilmasini yaxshilash, yo‘llarning qulayligi va xavfsizligini ta’minlash, sog‘lom turmush tarzi, faol hordiq chiqarish va dam olishi uchun shart-sharoit yaratish bo‘yicha faol ishlar amalga oshirilmoqda. Mazkur ishlar doirasida joylarda piyodalar uchun mo‘ljallangan yo‘llarning qulayligi tahlil qilindi.

Eʼtiborni tartibsiz, yagona uslubsiz va ko‘p hollarda tegishli shahar xizmatlari tomonidan beriladigan ruxsatnomalarsiz qurilgan binolar tortdi. Yo‘llar bo‘ylab joylashgan bu binolar aholi uchun xavf tug‘diradi, masalan, ularning aksariyatida to‘xtash joylari va yo‘laklari yo‘q, ular piyodalar yo‘laklariga chiqib ketgan tarzda tashkil etilgan. Shunday qilib, haydovchining bir daqiqalik xarid qilish jarayoni boshqa haydovchilar uchun ham, piyodalar uchun ham sezilarli noqulaylik va xavf tug‘diradi, — deyiladi shahar hokimligi xabarida.

Ayni paytda tahlil natijalari asosida tegishli shahar xizmatlari tomonidan noqonuniy qurilma va inshootlarni demontaj qilish ishlari boshlanmoqda.

Hokimlik o‘z navbatida, Toshkent shahri hududida maishiy va tijorat binolariga ega bo‘lgan poytaxt aholisini hujjatlarning shaharsozlik meʼyorlariga muvofiqligini yana bir bor sinchiklab tekshirishga chaqirdi.

Tadbirkorlar va shahar aholisini ushbu turdagi ko‘chmas mulkni xarid qilishda ehtiyotkor bo‘lishga, yuridik xizmatlar bilan maslahatlashishga chaqirish zarur, deb hisoblaymiz. Toshkent shahar kadastr xizmatlari tomonidan beriladigan, ularning chegaralari, maydoni va binolarning turlarini tasdiqlovchi hujjatlardan tashqari, bino va inshootlar uchun hujjatlarning muqobil turlari mavjud emas, — deyiladi xabarda.

Hokimlik potensial xaridning barcha tafsilotlarini aniqlashtirish uchun vakolatli organlarga shaxsan yoki onlayn davlat xizmatlari orqali murojaat qilish lozimligini bildirildi.