Қашқадарёда трактори ноқонуний олиб қўйилган фермерга МИБдан 355 миллион сўм компенсация ундирилиши ҳақида хабар берилган эди. МИБ матбуот хизмати компенсация ундируви ҳақидаги қарор ҳали кучга кирмаганини “Дарё”га маълум қилди.
МИБ муносабатида айтилишича, Қашқадарё вилоят давлат солиқ бошқармасининг 2021 йил 27 декабрдаги қарорига асосан қарздор “Самандар Нур” фермер хўжалигидан давлат фойдасига 5 та ижро ҳужжати бўйича жами 42 миллион 440 минг 589 сўм солиқ қарзини ундириш белгиланган.
Бироқ, қарздор томонидан ижро ҳужжатида кўрсатилган талаблар бюронинг Нишон туман бўлими давлат ижрочиси томонидан берилган ихтиёрий муддатларда бартараф этилмагани сабабли, “Суд ҳужжатлари ва бошқа органлар ҳужжатларини ижро этиш” тўғрисидаги қонун талабларига асосан, фермер хўжалиги балансидаги агротехника воситаси хатланиб, рўйхатга олинган ва тегишли далолатнома расмийлаштирилган ҳолда вақтинча сақлаш учун Нишон туман ИИБ Йўл ҳаракати хавфсизлиги бошқармасининг жарима майдончасига жойлаштирилган.
Ижтимоий тармоқларда фермер хўжалиги фойдасига 355 миллион сўм компенсация тўлаб берилганлиги юзасидан тарқатилган хабарлар асоссиз ҳисобланади. Сабаби, Қарши туманлараро иқтисодий суди томонидан чиқарилган ҳал қилув қарори қонуний кучга кирган эмас, — дейилади муносабатда.
Қайд этилишича, бюронинг Қашқадарё вилоят бошқармаси томонидан суднинг мазкур ҳолат юзасидан чиқарган ҳал қилув қарорига нисбатан апелляция шикоятини бериш чоралари кўрилмоқда.
Изоҳ (0)