Қирғизистон ва Қозоғистон электрон сигаретларни бутунлай тақиқлашни кўриб чиқмоқда. Бу ҳақда Sputnik хабар берди.
Қирғизистон парламенти электрон сигаретлар ва вейпларни олиб кириш, сотиш ва улардан фойдаланишни тақиқлашни таклиф қилмоқда. Улардан фойдаланиш мактаб ўқувчиларининг соғлиғига сезиларли даражада зарар етказиши таъкидланади.
“Электрон сигарет ва вейплар пайдо бўлгунига қадар ёшлар орасида чекишнинг тарқалиши 10 йил давомида пасайиб келаётган эди. Бироқ электрон тамаки маҳсулотлар анъанавий сигаретларнинг хавфсиз муқобили сифатида қаралиши унинг мактаб ўқувчилари орасида машҳурлигини ва ундан фойдаланишни оширди”, — дейилади хабарда.
Қирғизистонда электрон сигарет чекканлик учун 40 минг сом (тахминан 448 доллар), сотиш учун эса 50 минг сомдан 60 минг сомгача (560–672 доллар) жарима солиш таклиф қилинмоқда.
Икки ҳафта олдин Қозоғистон парламенти вейпни тўлиқ тақиқлашни маъқуллаган эди. Уларни сотиш учун 50 суткагача, олиб кириш ва тарқатиш учун эса 2 йилгача озодликдан маҳрум қилишни назарда тутади.
Туркманистонда эса электрон сигаретлар сотиш тақиқланади. Расмийлар вазиятни назоратга олишдан олдин мамлакатда электрон сигаретларга тақиқ қўйилишига қарамай ундан фойдаланиш кўпайганди. Туркманистонда расмийлар узоқ вақтдан бери тамакидан бутунлай холи давлат мақомига эришишни мақсад қилган. Сигаретлар доимий равишда етишмайди ва жуда қиммат. 2020 йилда аёлларга сигарет сотиш рад этилгани ҳақида хабарлар пайдо бўлди. 2022 йил охирида қонунчиликка расман ўзгартиришлар киритилиб, сигарет сотиб олишнинг минимал ёши 18 ёшдан 21 ёшгача кўтарилди.
Изоҳ (0)