Yangi Zelandiya parlamenti 2009-yil 1-yanvar kuni va undan keyin tug‘ilgan barcha fuqarolarga tamaki mahsulotlarini sotishni taqiqlovchi qonunni ma’qulladi, deb xabar bermoqda The Guardian. Ta’kidlanishicha, u bunday qonunni qabul qilgan birinchi mamlakatga aylandi. Yangi nizom 2023-yil 1-yanvardan kuchga kiradi.
Sigareta sotib olish uchun minimal yosh asta-sekinlik bilan oshiriladi. Chunonchi, 50 yildan keyin sigareta sotib olmoqchi bo‘lgan shaxs 63 yoshdan oshganini tasdiqlovchi hujjatni taqdim etishi kerak bo‘ladi, deb yozadi Time.
Ushbu taqiq bilan birga, tamaki iste’molini kamaytirishga qaratilgan boshqa nizomlar ham kuchga kiradi. Xususan, tamaki mahsulotlarida nikotin miqdori keskin pasaytiriladi, sigaretalar esa ixtisoslashtirilgan do‘konlarda sotila boshlaydi. Tamaki do‘konlarining umumiy soni o‘n marta qisqarib, 6000 tadan 600 tagacha kamayadi. Shu bilan birga, yangi tuzatishlar veyplar savdosini cheklamaydi.
The Guardian keltirgan ma’lumotlarga ko‘ra, Yangi Zelandiyada 2022-yil noyabr holatiga, har kuni chekadigan odamlar soni o‘tgan yildagi 9,4 foizdan 8 foizgacha qisqargan, bu kuzatuvlar tarixidagi eng past ko‘rsatkichdir. Shu bilan birga, veyp chekuvchilar soni 6,2 foizdan 8,3 foizgacha oshgan.
Yangi Zelandiya hukumati davlatni 2025-yilgacha “chekishdan xoli” mamlakatga aylantirishga intilmoqda.
Izoh (0)