O‘zbekiston bosh konsuli Sherzod Abdunazarov Turkiyaning UFS Tesis Yönetim Hizmetleri A.Ş. kompaniyasi boshqaruv kengashi aʼzolari bilan uchrashuv o‘tkazdi. Bu haqda “Dunyo” agentligi xabar berdi.
Qayd etilishicha, muloqot chog‘ida turkiyalik ishbilarmonlar bilan O‘zbekistonga xorijiy investitsiyalarni jalb etish, mamlakat fuqarolarini Turkiyadagi bo‘sh ish o‘rinlariga qonuniy tarzda joylashtirish masalalari muhokama qilingan.
Turkiya vakillarining aytishicha, Istanbul aeroportida tozalik va obodonlashtirish sohasida mingga yaqin ishchi o‘rinlari mavjud. Ular ushbu bo‘sh o‘rinlarga o‘zbekistonliklarni jalb etishdan manfaatdor ekanliklarini bildirgan. Turk tomoni ilk bosqichda 50 kishini ishga olish va ularni aeroport terminallari, pasport nazoratidan o‘tish hududi va bagaj sektorlariga joylashtirish maqsadga muvofiqligini taʼkidlagan.
Uchrashuv so‘nggida O‘zbekiston fuqarolarini Turkiyaga tashkiliy va qonuniy ravishda mehnat faoliyatiga jalb qilish maqsadida Tashqi mehnat migratsiyasi agentligi va UFS Tesis Yönetim Hizmetleri A.Ş. kompaniyasi vakillari o‘rtasida muzokaralar tashkil etish hamda hamkorlik shartnomasini tuzish to‘g‘risida kelishib olingan.
UFS Tesis Yönetim Hizmetleri A.Ş. kompaniyasiga 2005-yilda asos solingan. Kompaniya savdo markazlari, fabrikalar, o‘quv muassasalari, shifoxonalar, supermarketlar, ofislar va boshqa yirik tashkilotlarda tozalik va obodonlashtirish ishlari, shuningdek, keytering bilan shug‘ullanadi. Bugungi kunda kompaniya 10 mingdan oshiq ishchi kuchiga ega.
Avvalroq Kanada bilan mehnat migratsiyasi sohasida hamkorlikni yo‘lga qo‘yish, o‘zbekistonlik fuqarolarni Kanada mehnat bozoriga jalb qilish mexanizmlarini ishlab chiqish bo‘yicha muzokaralar olib borilgan edi.
Izoh (0)