Kambag‘allikni qisqartirish va bandlik vaziri Behzod Musayev hamda Kanadaning O‘zbekistondagi favqulodda va muxtor elchisi Alam Xemson o‘rtasida uchrashuv bo‘lib o‘tdi. Bu haqda Bandlik vazirligi matbuot xizmati xabar berdi.
Qayd etilishicha, uchrashuvda Kanada bilan mehnat migratsiyasi sohasida hamkorlikni yo‘lga qo‘yish, o‘zbekistonlik fuqarolarni Kanada mehnat bozoriga jalb qilish mexanizmlarini ishlab chiqish bo‘yicha muzokaralar olib borilgan.
“Ikki davlatning xususiy rekruting kompaniyalari o‘rtasidagi aloqalarni o‘rnatish, fuqarolarni Kanadaga yuborish va viza olish bilan bog‘liq masalalar muhokama qilindi”, — deyiladi xabarda.
Eslatib o‘tamiz, 2022-yilda sobiq tashqi ishlar vaziri Vladimir Norov Kanadaning mamlakatdagi favqulodda va muxtor elchisi (qarorgohi Moskva shahrida) Elison Meri Lekler bilan Toshkent shahrida Kanada viza markazini ochish masalasini o‘rganishga kelishib olgandi. O‘sha yilning o‘zida O‘zbekistondan Kanadaga mavsumiy ishchilarni yuborish yo‘lga qo‘yilishi mumkinligi to‘g‘risida xabarlar tarqalgan edi.
Izoh (0)