Ўзбекистон бош консули Шерзод Абдуназаров Туркиянинг UFS Tesis Yönetim Hizmetleri A.Ş. компанияси бошқарув кенгаши аъзолари билан учрашув ўтказди. Бу ҳақда “Дунё” агентлиги хабар берди.
Қайд этилишича, мулоқот чоғида туркиялик ишбилармонлар билан Ўзбекистонга хорижий инвестицияларни жалб этиш, мамлакат фуқароларини Туркиядаги бўш иш ўринларига қонуний тарзда жойлаштириш масалалари муҳокама қилинган.
Туркия вакилларининг айтишича, Истанбул аэропортида тозалик ва ободонлаштириш соҳасида мингга яқин ишчи ўринлари мавжуд. Улар ушбу бўш ўринларга ўзбекистонликларни жалб этишдан манфаатдор эканликларини билдирган. Турк томони илк босқичда 50 кишини ишга олиш ва уларни аэропорт терминаллари, паспорт назоратидан ўтиш ҳудуди ва багаж секторларига жойлаштириш мақсадга мувофиқлигини таъкидлаган.
Учрашув сўнггида Ўзбекистон фуқароларини Туркияга ташкилий ва қонуний равишда меҳнат фаолиятига жалб қилиш мақсадида Ташқи меҳнат миграцияси агентлиги ва UFS Tesis Yönetim Hizmetleri A.Ş. компанияси вакиллари ўртасида музокаралар ташкил этиш ҳамда ҳамкорлик шартномасини тузиш тўғрисида келишиб олинган.
UFS Tesis Yönetim Hizmetleri A.Ş. компаниясига 2005 йилда асос солинган. Компания савдо марказлари, фабрикалар, ўқув муассасалари, шифохоналар, супермаркетлар, офислар ва бошқа йирик ташкилотларда тозалик ва ободонлаштириш ишлари, шунингдек, кейтеринг билан шуғулланади. Бугунги кунда компания 10 мингдан ошиқ ишчи кучига эга.
Аввалроқ Канада билан меҳнат миграцияси соҳасида ҳамкорликни йўлга қўйиш, ўзбекистонлик фуқароларни Канада меҳнат бозорига жалб қилиш механизмларини ишлаб чиқиш бўйича музокаралар олиб борилган эди.
Изоҳ (0)