Turkiya Markaziy banki rahbari Hafize Gaye Erkan korrupsiya ayblovlari tufayli iste’foga chiqdi. U Turkiya prezidenti Rajab Toyyib Erdo‘g‘onga o‘z iste’fosi haqidagi so‘rovni yo‘lladi.
Erdo‘g‘on o‘zining sobiq o‘rinbosari, avval Nyu-York Federal zaxira bankida ishlagan va Amazon’ning bosh iqtisodchisi bo‘lgan Fotih Karahanni Markaziy bankning yangi rahbari etib tayinladi.
Hafize Gaye Erkan ilgari uzoq vaqt AQSHda yashagan va Goldman Sachs, Marsh McLennan va First Republic Bank kabi Amerika banklarida ishlagan. U Turkiya Markaziy bankini boshqargan birinchi ayol bo‘lgan va 2023-yilning yozida ushbu lavozimga tayinlanib, yuqori inflyatsiyaga qarshi kurash uchun asosiy stavkani keskin oshirishni boshlagandi. Bank oxirgi marta yanvar oyi oxirida stavkani oshirib, uni 45 foiz etib belgiladi. Ilgari Erdo‘g‘on uzoq yillar davomida bunday moliyaviy siyosatga qarshi chiqqan.
Markaziy bank rahbari “obro‘ga putur yetkazish kampaniyasi”dan shikoyat qildi
Erkanning iste’fosi oldidan Turkiya matbuotida mamlakat bosh bankirining o‘z qarindosh-urug‘lariga imtiyozlar bergani haqidagi xabarlar tarqaldi. Xabarlarga ko‘ra, uning otasi bank hisobidan ofis, xizmat mashinasi va qo‘riqchi olgan. Bundan tashqari, OAV yozganidek, Erdo‘g‘on Erkanning Hurriyet gazetasiga bergan intervyusidan g‘azablangan — unda u uy-joy narxining qimmatligi tufayli Istanbulda kvartira topa olmay, ota-onasinikiga qaytganini aytgan.
Hafize Gaye Erkan o‘zining iste’fo maktubida “unga qarshi keng ko‘lamda obro‘siga putur yetkazish kampaniyasi uyushtirilganidan” shikoyat qildi. Markaziy bank rahbari o‘rnini bo‘shatishga qaror qilib, “oilasi va bir yarim yoshli farzandiga zarar yetkazmaslikka harakat qilmoqda”, deb yozadi Erkan ijtimoiy tarmoqda.
Izoh (0)