O‘zbekistonda jinoyat ishlari doirasida ayrim protsessual harakatlarni amalga oshirish uchun elektron sanksiya berish tartibi joriy etiladi. Bu haqda “O‘zbekiston – 2030” strategiyasini “Yoshlar va biznesni qo‘llab-quvvatlash yili”da amalga oshirishga oid davlat dasturi to‘g‘risida so‘z boradi.
Bu yerda gap telefonlar va boshqa telekommunikatsiya qurilmalari orqali olib boriladigan so‘zlashuvlarni eshitib turish, tintuv o‘tkazish, pochta-telegraf jo‘natmalarini xatlab qo‘yish va boshqa protsessual harakatlar haqida ketmoqda.
Davlat siri va qonun bilan qo‘riqlanadigan boshqa ma’lumotlar bilan bog‘liq ishlarda elektron sanksiya berilmaydi.
Loyihada ko‘rsatilishicha, bunday taklif Bosh prokuratura, Oliy sud, Ichki ishlar vazirligi va Adliya vazirligi tomonidan kiritilgan.
Shuningdek, “Xavfsiz va tinchliksevar davlat” tamoyiliga asoslangan siyosatni izchil davom ettirish yo‘nalishi bo‘yicha Qurolli Kuchlar, sohaga masʼul boshqa vazirlik va idoralarning kiberxavfsizlik hamda epidemiologik barqarorlikni taʼminlash bo‘yicha salohiyatini keskin oshirish maqsadida:
- kiberxavfsizlik infratuzilmasi muhim elementlari hisoblanuvchi axborot tizimlari attestatsiyasi va ekspertizasi uchun har bir vazirlik va idorada masʼul shaxslar javobgarligi belgilanadi;
- mazkur yo‘nalishlarda kadrlar tayyorlash bo‘yicha o‘quv dasturlari va o‘qitish metodikalarini zamonaviy tahdid va tajribadan kelib chiqqan holda takomillashtirish choralari ko‘rib boriladi;
- mamlakatning raqamli va harbiy-tibbiy infratuzilmasini takomillashtirish, masʼul idoralarni zamonaviy texnika va tibbiyot apparaturalari bilan bosqichma-bosqich taʼminlash dasturi amalga oshiriladi;
- fuqarolar shaxsiy maʼlumotlarining himoyasini kafolatli taʼminlash, bank va to‘lov tizimlari uchun firibgarlikka qarshi va zamonaviy biometrik tizimlari joriy etiladi.
Davlat dasturi loyihasi bo‘yicha jamoatchilik muhokamasi 14 fevralgacha davom etadi.
Eslatib o‘tamiz, 2023-yilning martida mamlakatda kelgusida jinoyatlarni tergov qilish jarayonida “Xabeas korpus” institutini qo‘llash amaliyotini yanada kengaytirish maqsadida tintuv o‘tkazish, telefon so‘zlashuvlarini eshitib turish va mulkni xatlashga sanksiya berish vakolati prokurorlardan sudlarga o‘tkazilishi aytilgan edi.
Izoh (0)