O‘zbekistonda kelgusida jinoyatlarni tergov qilish jarayonida prokurorlarning ayrim vakolatlari sudlarga o‘tkaziladi. Bu haqda prezidentning tegishli farmoni bilan tasdiqlangan dasturda so‘z boradi.
Unga ko‘ra, mamlakatda kelgusida jinoyatlarni tergov qilish jarayonida “Xabeas korpus” institutini qo‘llash amaliyotini yanada kengaytirish maqsadida tintuv o‘tkazish, telefon so‘zlashuvlarini eshitib turish va mulkni xatlashga sanksiya berish vakolati prokurorlardan sudlarga o‘tkaziladi.
Adolat va qonun ustuvorligini mustahkamlash, inson huquq va erkinliklariga so‘zsiz rioya etilishini taʼminlash borasida yuqoridagi tartibni nazarda tutuvchi qonun loyihasi Oliy Majlis Qonunchilik palatasiga kiritiladi.
Shuningdek, farmonning mazkur bandi bilan jinoyat ishini sudlarga ayblov xulosasi (ayblov dalolatnomasi) va himoyachi fikri bilan birga taqdim etish tartibini joriy etish hamda advokatlik faoliyati bilan shug‘ullanish huquqini beruvchi litsenziyani olish uchun yuridik mutaxassislik bo‘yicha kamida ikki yillik ish stajiga ega bo‘lish talabini bekor qilishga oid hujjat loyihalarini ham ishlab chiqish vazifasi qo‘yilgan.
Ushbu masalalar bo‘yicha tegishli qonunlar loyihalarining davlat dasturida belgilangan muddatlarda ishlab chiqilib, kiritilishini taʼminlash esa Oliy sud, Adliya vazirligi va Bosh prokuraturaga yuklangan.
Izoh (0)