Ichki ishlar organlari xodimlarini obro‘sizlantirish moddasi Senat qo‘mitalari tomonidan ko‘rib chiqilmoqda. Bu haqda Oliy Majlis Senati raisi Tanzila Norboyeva BBC o‘zbek xizmati muxbiri bilan suhbatda ma’lum qildi.
Intervyu davomida jurnalist Senat raisidan huquq-tartibot idoralari xodimlarini obro‘sizlantirish maqsadida tasvirga olib tarqatish normasi haqida so‘rab, bunday qonunning Senat tomonidan tasdiqlanishi demokratiya tamoyillariga qarshi bo‘lib qolmaydimi degan savolni berdi.
“Bu qonun to‘g‘risida turli fikrlar bo‘lyapti. Ochiqlik siyosatining ustuvorligi sabab esa, har bir qonun qabul qilish jarayoni jamoatchilik eʼtiboriga havola qilinyapti va jamoatchilikning fikri alohida eʼtiborga olinyapti. Bu qonun qonunchilik palatasida qabul qilindi. U yerda ham turli fikrlar bildirildi. Lekin ko‘pchilik ovoz bilan qonun ko‘rib chiqish uchun Senatga yuborildi. Hozirgi kunda har bir qo‘mita tomonidan qonun o‘rganishga berilgan. Hozircha faqat birgina qo‘mitaning fikri bilan tanishdik, boshqa qo‘mitalar va xalqaro tajribalarga va olgan xalqaro majburiyatlarimizga zid bo‘lib, bo‘lmaganini o‘rganib, o‘zlarining xulosasini berganidan keyin Senat kengashi o‘z fikrini bildiradi va majlisda qaror qabul qiladi. Yakuniy xulosani men bildira olmayman, chunki qo‘mitalarimizda ko‘rib chiqish jarayoni davom etmoqda”, — deydi Tanzila Norboyeva.
Oliy Majlis Senatning Mudofaa va xavfsizlik masalalari qo‘mitasida “Yo‘l harakati xavfsizligi tizimi takomillashtirilishi munosabati bilan O‘zbekiston Respublikasining Jinoyat kodeksi, Jinoyat-protsessual kodeksi va O‘zbekiston Respublikasining Ma’muriy javobgarlik to‘g‘risidagi kodeksiga qo‘shimcha va o‘zgartirishlar kiritish haqida”gi qonuni dastlabki tarzda muhokama qilindi.
Qonunning bir qismi — Ma’muriy javobgarlik to‘g‘risidagi kodeksning 195-prim 2-moddasida nazarda tutilgan huquqbuzarlik va unga belgilanayotgan jazo choralari jamoatchilik e’tirozlariga sabab bo‘lmoqda.
Izoh (0)