Belarus prezidenti Aleksandr Lukashenkoni haqorat qilganlikda ayblangan ukrainalik Vladimir Lisitsa uch yilga qamaldi. Bu haqda Belarus huquqni himoya qilish markazi xabar berdi.
Ukrainalik erkak davlat amaldorlarini haqorat qilishda aybdor deb topildi va qamoq jazosidan tashqari, sud erkakka 7400 Belarus rubli (salkam 2260 dollar) miqdorida jarima soldi. Bundan tashqari, erkak Belarus bosh prokurori Andrey Shved va Novopolotsk shahar kengashi deputati Igor Medzvedskiyga ma’naviy zarar uchun 3 ming Belarus rubli (912 dollar) to‘lashi kerak.
Qayd etilishicha, erkak “Odnoklassniki” ijtimoiy tarmog‘idagi postida Lukashenko, Gomel viloyati harbiy komissari va bir necha deputatlar haqida senzurasiz izohlar qoldirgan.
Huquq himoyachilarining ta’kidlashicha, sudda erkak o‘z aybini tan olgan va Belarus bosh prokurori va shahar kengashi deputatiga ma’naviy zararni qoplash “ortiqcha miqdor” ekanini aytgan.
Vladimir Lisitsa Sumi viloyatida tug‘ilgan. 2023-yil sentyabr oyida Liozniy tumani prokuraturasi uning “Odnoklassniki” tarmog‘idagi sahifasini urushga qarshi postlar va Ukraina bayrog‘i tushirilgan avatar uchun “ekstremistik material” deb topgan.
Izoh (0)