Belarus prezidenti Aleksandr Lukashenko “Prezident to‘g‘risida”gi qonunga o‘zgartirishlarni imzoladi, deb xabar berdi davlat rahbari matbuot xizmati. O‘zgartirishlar, xususan, nafaqaga chiqqan prezident va uning oila a’zolariga daxlsizlik, umrbod himoya va davlat ko‘chmas mulkiga bo‘lgan huquqni kafolatlaydi. Qonun loyihasining matni hozir Belarusning qonuniy Internet-portalida emas, lekin veb-arxivda saqlanib qolgan.
O‘zgartirilgan qonunda prezidentlik lavozimini tark etgan shaxs Butun Belarus Xalq assambleyasi delegati va Respublika kengashining umrbod a’zosi bo‘lib qolishi nazarda tutiladi. Sobiq prezident va uning oila a’zolariga uning boshqaruvi davrida sodir etilgan har qanday jinoyatlar uchun daxlsizlik beriladi.
Qonunda aytilishicha, prezident iste’foga chiqqanidan keyin davlat ko‘chmas mulki, jumladan, kapital binolari joylashgan uchastka sovg‘a qilinadi. Bundan tashqari, o‘zgartirishlarda saylovga qadar kamida 20 yil respublika hududida yashagan va chet el propiskasiga ega bo‘lmagan 40 yoshdan yuqori fuqarogina prezident bo‘lishi mumkinligi belgilab qo‘yildi.
Aleksandr Lukashenkoning matbuot xizmati aniqlik kiritishicha, prezident to‘g‘risidagi qonunni “har tomonlama tuzatish” 2022-yilda respublika konstitutsiyasiga o‘zgartirishlar kiritish orqali ko‘zda tutilgan. Ushbu tuzatishlar prezidentlik boshqaruvini ikki muddat bilan cheklaydi, shuningdek, Butun Belarus xalq assambleyasini hokimiyat tizimida birlashtiradi.
Izoh (0)