Bishkekning Pervomayskiy tuman sudi avvalroq Ukrainadagi urushda qatnashgani uchun 10 yilga ozodlikdan mahrum etilgan qirg‘izistonlik Asqar Kubanichbek o‘g‘li ishini ko‘rib chiqdi. Bu haqda “AKIpress” xabar berdi.
Sud Kubanichbek o‘g‘lini Qirg‘iziston Jinoyat kodeksining 416-moddasi 1-qismida nazarda tutilgan jinoyatni sodir etganlikda aybdor deb topdi. Sud ayblanuvchini 7 yilga ozodlikdan mahrum qildi, biroq uch yillik sinov nazorati bilan ozod qildi.
Milliy xavfsizlik davlat qo‘mitasi Kubanichbek o‘g‘lini 2023-yil yanvarida hibsga olgandi. Keyin o‘sha yilning may oyida poytaxtning Pervomayskiy tuman sudi erkakni 10 yilga ozodlikdan mahrum qilgan. Tergov ma’lumotlariga ko‘ra, u Rossiya armiyasi bilan shartnoma tuzgan. O‘sha yilning iyun oyida Bishkek shahar sudi Pervomayskiy sudining hukmini o‘z kuchida qoldirgan.
Ayblanuvchiga nisbatan qamoqqa olish tarzidagi tanlangan ehtiyot chorasi sud hukmi qonuniy kuchga kirgunga qadar mamlakatni tark etmaslik to‘g‘risidagi yozma majburiyatga o‘zgartirildi.
Avvalroq Kubanichbek o‘g‘li Rossiyaga murojaat qilib, pasport va fuqarolik berishni so‘ragandi.
Izoh (0)