Qirg‘iziston prezidenti Sadir Japarov “Kabar” davlat axborot agentligiga bergan intervyusida tashqi qarz masalasiga to‘xtaldi.
Japarov “bundan buyon tashqi qarzlar haqida tashvishlanishga asos yo‘q”ligini aytdi. Uning so‘zlariga ko‘ra, ilgari olingan kreditlar o‘zini o‘zi qoplaydigan loyihalarga ishlatilmagan va “pul go‘yoki qumga tushganday g‘oyib bo‘lgan”.
“Shimol-Janub, Datka-Kemin, issiqlik elektr stansiyalari uchun olingan oxirgi kreditlar to‘g‘ri bo‘ldi. Bizga bu loyihalar kerak edi, lekin ular bizga ikki barobar qimmatga tushdi. Nazorat juda yomon, o‘g‘riliklar kuzatildi. Bu loyihalarni yarim xarajat evaziga yakunlash mumkin edi va to‘lash muddati qisqaroq bo‘lardi. Endi bu qarzlarni qaytarish muddati keldi va biz ularni to‘lashni boshladik”, — dedi prezident.
Japarovga ko‘ra, Qirg‘iziston 2035-yilgacha avval olingan qarzlarini to‘lay oladi. Shuningdek, u agar mamlakat kreditni muddatidan oldin to‘lasa, foiz stavkasi ancha yuqori bo‘lishini eslatdi.
“Shuning uchun biz qarzni jadval asosida to‘laymiz. Bunda hech qanday risk yo‘q, chunki budjetimiz necha marta oshganini ko‘rmoqdasiz. Darhaqiqat, avvallari budjetimiz zaif bo‘lgani uchun tashqi qarzimizni to‘lay olmaymiz, degan xavotirlar bor edi”, — dedi Japarov.
U bundan buyon hokimiyat o‘zini oqlamaydigan loyihalar uchun kredit ololmasligini ta’kidladi. Shu tariqa prezident Qirg‘iziston yaqinda Qambar-Ota GES-1 qurilishi uchun kredit olishini ma’lum qildi. Tegishli loyiha 12-13 yil ichida o‘zini oqlashi kutilmoqda.
“Biz qisqa muddatda o‘z samarasini bermaydigan loyihalarni ma’qullamaymiz. Shuning uchun tashvishlanishga hech qanday sabab yo‘q. Endi bu mavzuni ko‘tarishga hojat yo‘q. Siyosiylashtirishning hojati yo‘q”, — deya xulosa qildi u.
Izoh (0)