Qirg‘iziston prezidenti Sadir Japarov 2024-yilda ekinlarni sug‘orish suvi tanqisligini bartaraf etish uchun yangi sutkalik (BSR) va o‘n kunlik (BDR) suv havzalari barpo etilishini ma’lum qildi, bu esa qo‘shni davlatlarni ham suv bilan ta’minlaydi, deb xabar bermoqda “Kabar”.
Qirg‘izistonda BSR va BDR uslubida suv yig‘ish qo‘shni davlatlarga sug‘orish mavsumida yordam beradimi, degan savolga javob berar ekan, Sadir Japarov uning topshirig‘iga ko‘ra, butun mamlakat bo‘ylab yangi sutkalik va o‘n kunlik suv havzalari barpo etilishini ta’kidladi. Shuningdek, mavjud havzalar tozalanadi, bu birinchi navbatda quyiroqda joylashgan qo‘shni mamlakatlarga foyda keltiradi, chunki sug‘orish mavsumida oqar suv bilan bog‘liq kelishmovchiliklar yuzaga kelmoqda.
“BSR va BDR birinchi navbatda quyi oqimda yashovchi qo‘shnilarimiz uchun foydali, chunki sug‘orish mavsumida suv bilan bog‘liq kelishmovchiliklar yuzaga keladi. Agar qishda BSR va BDRda muzdan erigan suvni yig‘sak, bahordan daryo suvi to‘liq qo‘shnilarimizga oqadi. Ular avvalgidan ham ko‘proq suv oladi. Sug‘orish mavsumida dehqonlarimiz BSR va BDR suvlaridan, qo‘shnilarimiz esa oqar suvdan foydalanishlari mumkin bo‘ladi”, — deb tushuntirdi Japarov.
Uning eslatishicha, kunlik tartibga solish havzalari yo‘qligi sababli suv Bishkekka oqib kelyapti, bu esa ko‘chalarni suv bosishiga sabab bo‘lmoqda.
“Agar BSR bo‘lganda, bu suvlarni saqlab qolish mumkin edi. Mamlakatimizning barcha hududlarida shunday bo‘lmoqda. Agar qishda suv zaxira qilsak, qo‘shnilarimizga ham yetarli bo‘lardi. Keyinchalik nizolar kelib chiqmasligi uchun qishda oqib ketadigan suvlardan samarali foydalanishga intilyapmiz. Qo‘shnilarimizga qancha kerak bo‘lsa, shuncha suv beramiz”, — dedi Qirg‘iziston prezidenti.
Japarov ushbu muammolarni hal etish ustida ish olib borayotganini qo‘shimcha qildi.
“Biz nafaqat o‘zimizni, balki qo‘shnilarimizni ham o‘ylaymiz, chunki umumiy muammolarni birgalikda o‘ylashimiz kerak, biz ariqning boshida turibmiz, suv bermaymiz, deb bahslashish bema’nilik. Hammamiz qardosh xalqmiz, azaliy qo‘shnimiz va ko‘p jihatdan bir-birimizga bog‘liqmiz. Hammasini sanab o‘tirmayman, buni odamlarning o‘zi juda yaxshi biladi”, — deb xulosa qildi u.
Izoh (0)