Fransiya prezidenti Emmanuel Makron Bundestagda marhum Volfgang Shoyble xotirasiga bag‘ishlangan dafn marosimida nemis tilida nutq so‘zladi. Bu haqda Bild xabar berdi.
Fransiya prezidenti 15 daqiqalik nutqining yarmini nemis tilida so‘zlagan. Makron 1962-yilda Lyudvigsburgda Fransiya sobiq prezidenti Sharl de Goll nemis tilida murojaat qilganini esga oldi.
“Germaniya davlat arbobini yo‘qotdi. Yevropa tayanchini yo‘qotdi. Fransiya do‘stini yo‘qotdi”, — degan Makron 15 daqiqalik nutqida.
Fransiya Tashqi ishlar vazirligining nemis tili va madaniyati o‘qituvchisi, Makronga dars bergan Frank Groningerning aytishicha, prezident kam vaqt mashq qilgan.
“Kecha taxminan bir yarim soat, keyin bugun ertalab Berlinga uchishdan oldin taxminan bir soat mashq qildik. Keyin yana samolyotda nutqning ba’zi detallarini ko‘rib chiqdik”, — deydi Groninger.
Uning ta’kidlashicha, Makron bu tilni maktab va universitetda o‘rgangan, shu sababli “ma’lum bilimga ega bo‘lgan”.
Groninger, shuningdek, Fransiyadagi norozilik namoyishlari tufayli bekor qilingan o‘tgan iyul oyida Germaniyaga davlat tashrifiga tayyorgarlik ko‘rishda prezident bilan mashq qilishganini esladi.
“Maqsad odamlarni hayratda qoldirish edi. Nutqning emotsional qismi va texnik qismi borligini ko‘rdingiz. G‘oya nutqning emotsional qismini nemis tilida bayon qilish edi, shunda u yanada kuchliroq bo‘ladi va bu prezident nemis tilida nutq so‘zlash uchun harakat qilayotganini bildiradi”, — deya qo‘shimcha qildi Makronning o‘qituvchisi.
Bild kuzatuvchisining qayd etishicha, Fransiya rahbarining Bundestagdagi bu harakati nemis tomoni uchun kutilmagan bo‘ldi. Kansler Olaf Shols sinxron tarjima uchun allaqachon quloqchinlarni taqib olgan edi. Lekin keyin ularni tezda yechib oldi. Bundestag Makronning nutqiga qarsaklar bilan javob qaytardi. Zalda hozir bo‘lgan Germaniyaning sobiq kansleri Angela Merkel ham uni olqishladi.
Izoh (0)