Франция президенти Эммануэль Макрон Бундестагда марҳум Волфганг Шойбле хотирасига бағишланган дафн маросимида немис тилида нутқ сўзлади. Бу ҳақда Bild хабар берди.
Франция президенти 15 дақиқалик нутқининг ярмини немис тилида сўзлаган. Макрон 1962 йилда Людвигсбургда Франция собиқ президенти Шарл де Голл немис тилида мурожаат қилганини эсга олди.
“Германия давлат арбобини йўқотди. Европа таянчини йўқотди. Франция дўстини йўқотди”, — деган Макрон 15 дақиқалик нутқида.
Франция Ташқи ишлар вазирлигининг немис тили ва маданияти ўқитувчиси, Макронга дарс берган Франк Гронингернинг айтишича, президент кам вақт машқ қилган.
“Кеча тахминан бир ярим соат, кейин бугун эрталаб Берлинга учишдан олдин тахминан бир соат машқ қилдик. Кейин яна самолётда нутқнинг баъзи деталларини кўриб чиқдик”, — дейди Гронингер.
Унинг таъкидлашича, Макрон бу тилни мактаб ва университетда ўрганган, шу сабабли “маълум билимга эга бўлган”.
Гронингер, шунингдек, Франциядаги норозилик намойишлари туфайли бекор қилинган ўтган июль ойида Германияга давлат ташрифига тайёргарлик кўришда президент билан машқ қилишганини эслади.
“Мақсад одамларни ҳайратда қолдириш эди. Нутқнинг эмоционал қисми ва техник қисми борлигини кўрдингиз. Ғоя нутқнинг эмоционал қисмини немис тилида баён қилиш эди, шунда у янада кучлироқ бўлади ва бу президент немис тилида нутқ сўзлаш учун ҳаракат қилаётганини билдиради”, — дея қўшимча қилди Макроннинг ўқитувчиси.
Bild кузатувчисининг қайд этишича, Франция раҳбарининг Бундестагдаги бу ҳаракати немис томони учун кутилмаган бўлди. Канцлер Олаф Шольц синхрон таржима учун аллақачон қулоқчинларни тақиб олган эди. Лекин кейин уларни тезда ечиб олди. Бундестаг Макроннинг нутқига қарсаклар билан жавоб қайтарди. Залда ҳозир бўлган Германиянинг собиқ канцлери Ангела Меркель ҳам уни олқишлади.
Изоҳ (0)