Қирғизистон президенти Садир Жапаров “Кабар” давлат ахборот агентлигига берган интервьюсида ташқи қарз масаласига тўхталди.
Жапаров “бундан буён ташқи қарзлар ҳақида ташвишланишга асос йўқ”лигини айтди. Унинг сўзларига кўра, илгари олинган кредитлар ўзини ўзи қоплайдиган лойиҳаларга ишлатилмаган ва “пул гўёки қумга тушгандай ғойиб бўлган”.
“Шимол-Жануб, Датка-Кемин, иссиқлик электр станциялари учун олинган охирги кредитлар тўғри бўлди. Бизга бу лойиҳалар керак эди, лекин улар бизга икки баробар қимматга тушди. Назорат жуда ёмон, ўғриликлар кузатилди. Бу лойиҳаларни ярим харажат эвазига якунлаш мумкин эди ва тўлаш муддати қисқароқ бўларди. Энди бу қарзларни қайтариш муддати келди ва биз уларни тўлашни бошладик”, — деди президент.
Жапаровга кўра, Қирғизистон 2035 йилгача аввал олинган қарзларини тўлай олади. Шунингдек, у агар мамлакат кредитни муддатидан олдин тўласа, фоиз ставкаси анча юқори бўлишини эслатди.
“Шунинг учун биз қарзни жадвал асосида тўлаймиз. Бунда ҳеч қандай риск йўқ, чунки бюджетимиз неча марта ошганини кўрмоқдасиз. Дарҳақиқат, авваллари бюджетимиз заиф бўлгани учун ташқи қарзимизни тўлай олмаймиз, деган хавотирлар бор эди”, — деди Жапаров.
У бундан буён ҳокимият ўзини оқламайдиган лойиҳалар учун кредит ололмаслигини таъкидлади. Шу тариқа президент Қирғизистон яқинда Қамбар-Ота ГЕС-1 қурилиши учун кредит олишини маълум қилди. Тегишли лойиҳа 12-13 йил ичида ўзини оқлаши кутилмоқда.
“Биз қисқа муддатда ўз самарасини бермайдиган лойиҳаларни маъқулламаймиз. Шунинг учун ташвишланишга ҳеч қандай сабаб йўқ. Энди бу мавзуни кўтаришга ҳожат йўқ. Сиёсийлаштиришнинг ҳожати йўқ”, — дея хулоса қилди у.
Изоҳ (0)