Namangan shahar tibbiyot birlashmasi masʼul xodimlaridan biri ichki ishlar idoralariga murojaat qilib, nomaʼlum shaxs tomonidan plastik kartasidan 2 million so‘m yechib olinganini bildirgan va chora ko‘rishni so‘ragan. Bu haqda “Daryo” muxbiri Azizbek Abduvaliyev xabar bermoqda.
Viloyat IIB Kiberxavfsizlik bo‘limi xodimlari va JQB tezkor vakillari tomonidan olib borilgan surishtiruvlar davomida ushbu jinoyatni Namangan shahridagi maktablardan birining 9-sinf o‘quvchisi sodir etganligi aniqlandi. Undan daliliy ashyo sifatida o‘zlashtirilgan pullar o‘tkazilgan 2 dona plastik karta olingan.
Maʼlum bo‘lishicha, o‘quvchi tibbiyot birlashmasi xodimining ish faoliyatida yordamlashish uchun uning oldiga kelib turgan. Ustozi safarga ketganida esa uning xonasidagi kompyuterga o‘rnatilgan Click mobil ilovasi orqali jabrlanuvchiga tegishli pullarni onasi va do‘stining plastik kartalariga o‘tkazib yuborgan.
Viloyat IIB matbuot xizmatining qayd etishicha, ushbu holat yuzasidan jinoyat ishi qo‘zg‘atilgan va dastlabki tergov harakatlari olib borilmoqda.
Izoh (0)