Qatar maydonlarida futbol bo'yicha qit’aning eng yirik musobaqasi — Osiyo Kubogi bo‘lib o‘tmoqda. Musobaqada O‘zbekiston milliy terma jamoasi ham ishtirok etmoqda. 18-yanvar kuni terma jamoa 2-tur doirasida Hindistonga qarshi maydonga tushdi va ishonchli 3:0 hisobida g‘alaba qozondi.
Uchrashuv haqida “Sports.ru” saytidagi “O‘zbekskaya kuxnya” blogida chiqqan maqolani “Daryo” o‘zbek tilida taqdim etadi.
Suriyaga qarshi 1-turdagi o‘yindan keyin hamma bir ovozdan: “Nima uchun Sergeyev o‘yinga tushmadi?”, — deb murabbiyni tanqid qildi. Haqiqatan ham Srechko Katanes tanqid qilishlari uchun hamma narsani qildi deyish mumkin. Ektor Kuperning Suriyasi himoyaviy uslubda juda samarali harakat qildi. Na Masharipovga, na O‘runovga “toza havo” berdi. Birinchi bo‘limdan so‘ng Katanes o‘ng qanotni to‘lig‘icha almashtirdi. Lekin sof forvardni o‘yinga qo‘shishni ancha kechiktirdi.
Maydonga Fayzullayev va Sergeyev tushgach, ozmi-ko‘pmi o‘yinga rang-baranglik kirdi va darvoza tomon bir nechta aniq zarbalar berildi.
Hindistonga qarshi o‘yindan oldingi matbuot anjumanida Katanes yana bir muhim o‘yinchi, o‘ng qanot himoyachisi Hojiakbar Alijonov uchun ham musobaqa yakunlanganini aytdi. Terma jamoa matbuot xizmati bunga hanuzgacha munosabat bildirmadi.
Hindistonga qarshi o‘yin katta ahamiyat kasb etardi. Uchrashuvdan oldin guruhdagi birinchi o‘yinda Suriya Avstraliyaga mag‘lub bo‘lib ochko yo‘qotdi. O‘zbekiston 3-turda Avstraliyaga qarshi saf tortsa, Suriya esa nisbatda kuchsizroq Hindiston bilan o‘ynaydi. Ko‘p narsa xavf ostida edi va shuning uchun tarkib optimalga yaqinroq tanlandi. Katanes 4-2-3-1 sxemasini tanladi. Igor Sergeyev markaziy hujumchi sifatida, O‘runov markazga yaqinroq pozitsiyada harakat qilishi, Sergeyevga qanotlarda Jaloliddin Masharipov va Abbos Fayzullayev yordam berishi kutilgan edi.
Yana bir jihati, o‘yinning rasmiy protokolida boshqacharoq aytilgan. Yaʼni 4-4-1-1 sxemasi Sergeyev markaziy hujumchi sifatida, Abbos Fayzullaev hujumchi ortida joylashdi. Keyingi o‘rinda yarim himoyachilar kvarteti: Masharipov-Hamrobekov-Shukurov-O‘runov. Ularning harakatini kuzatish juda qiziq edi. Kerak bo‘lsa, taktikani 4-3-3 sxemasiga o‘zgartirish mumkin, bunda Masharipov va O‘runov hujumkor vengerlar o‘rnini egallaydi.
Raqib o‘yinni faol boshlaganiga qaramay, Abbos Fayzullayev ilk hujumdayoq bahsda hisobni ochdi. Qizig‘i, hujumni Abbosning o‘zi boshlab, o‘zi yakuniga ketkazdi. Raqib jarima maydonchasiga yaqinroqda Fayzullayev chap qanotdagi Nasrullayevni hujumga chorladi. Sherzodning uzatmasidan keyin jarima maydonchasi ichidagi Shukurovning assistidan keyin Fayzullayevning o‘zi hujumni yakuniga yetkazdi.
Qizig‘i, yakuniy harakatlar ikkinchi qavatda amalga oshirildi. bo‘yli baland bo‘lmagan Shukurov va Fayzullaev raqib jarima maydonchasidagi kurashda g‘alaba qozondi.
Uchrashuvning yettinchi daqiqasida Otabek Shukurov Meksika bilan o‘rtoqlik uchrashuvida Gilermo Ochoa darvozasini ishg‘ol qilgan zarbasini takrorlashga harakat qilib ko‘rdi. Oradan bir necha daqiqa o‘tib, Masharipov jarima zarbasini amalga oshirdi va uning zarbasidan so‘ng to‘p darvoza to‘siniga tegdi. Uchrashuv avalidagi hayajon o‘tishi bilan hammasi keskin o‘zgardi. Imkoniyatlar paydo bo‘la boshladi, hujumlar yaratildi va to‘pga egalik qilish foizi ikki karra oshdi.
18-daqiqada Igor Sergeyevning saʼy-harakatlari evaziga hisob 2:0 ko‘rinishiga keldi. Nihoyat, Srechko Katanes nominal markaziy hujum chizig‘ida Oston O‘runovni emas, balki foydaliroq bo‘lgan Sergeyevga imkoniyat berdi. Biroq, bu golda ham Abbos Fayzullayev katta sahnaga chiqdi. Maydon markazida u raqibdan to‘pni olib qo‘ydi va o‘zi hujum tashkil qildi, uning uzatmasidan so‘ng himoyachi o‘z darvozasini ishg‘ol qilishiga bir baxya qoldi. To‘p darvoza ustuniga tegib, maydonga qaytdi, to‘pga birinchi bo‘lib Sergeyev yetib keldi va oradagi farqni ikkitaga yetkazdi.
Hujumchi uchun bu gol terma jamoadagi yubiley goliga aylandi. Sergeyev 20-golini urdi va milliy terma jamoaning 90-yillardagi afsonasi Igor Shkviringa yetib oldi.
35-daqiqada Masharipovning zargarona uzatmasidan so‘ng Fayzullayev darvozabon bilan deyarli birga-bir holatga chiqdi, lekin bu safar uning zarbasini darvozabon qaytarishga muvaffaq bo‘ldi. Birinchi bo‘limga qo‘shib berilgan daqiqalarda Farrux Sayfiyevning jarima maydonchasiga uzatgan to‘pini Sherzod Nasrullayev darvozaga joylab qo‘ydi.
Qizig‘i shundaki, barcha gollarni 1-turda o‘yinni zaxiradan boshlagan futbolchilar kiritdi. Bu bosh murabbiyning tarkib tanlashdagi xatolarini ham ko‘rsatib berdi.
Tanaffusda Katanes taktik o‘zgarish qilganini qo‘shimcha qilish joiz. Sherzod Nasrullayevga dam berishga qaror qilib, uning o‘rniga maydonga o‘ng qanot himoyasi Zafarmurod Abdurahmatov tushirdi. O‘yinni o‘ng qanotda boshlagan Farrux Sayfiyev o‘zining chap qanotiga qaytdi.
Ikkinchi bo‘lim boshida hindlar O‘tkir Yusupov darvozasi qarshisida bir nechta hujumlar uyushtirdi. Darvozaga yo‘llangan zarbalardan biri ustunga tegib qaytdi. Ammo o‘yinning qolgan qismida sifatli ijrochilarga ega bo‘lmagan Hindiston O‘zbekiston terma jamoasiga yetarlicha qarshilik ko‘rsata olmadi. O‘zbekiston terma jamoasi esa birinchi o‘yindagi xatolarni to‘g‘riladi va keyingi bosqich masalasini muddatidan oldin hal qilgan Avstraliyaga qarshi katta ishtiyoq bilan hozirlik ko‘rmoqda.
Mirjalol Norqobilov tarjimasi
Izoh (0)