Qashqadaryo viloyati Koson tumanida yo‘ldan o‘tib ketayotgan yo‘l-patrul xizmati xodimlarini haqoratlagan shaxslar javobgarlikka tortildi. Bu haqda “Millar” informatsion dasturida ma’lum qilindi.
Qayd etilishicha, 4 nafar erkak yo‘ldan o‘tib ketayotgan YPX xodimlarining avtomashinasini videoga olib, xodimlarni turli so‘zlar bilan haqorat qilgan. Ularni onasidan so‘kib, videoni Telegram orqali turli guruhlarga jo‘natgan.
“7-yanvar kuni o‘rtoqlarimiz bilan yig‘ildik. Spirtli ichimlik ichib olgandik, keyin tashqariga chiqdik. O‘sha vaqtda mahallamizning Telegram guruhiga yo‘ldan o‘tayotgan GAI mashinasiga qarab haqoratli so‘zlar ishlatdik. Hech qanday GAI xodimlariga adovatim yo‘q. Hammasidan uzr so‘rayman. Videoni kim tarqatdi nomaʼlum”, — deydi erkaklardan biri.
Sudlanuvchilarning qolganlari ham mast holatda bo‘lgani va qilgan ishidan pushaymonligini bildirgan.
Jinoyat ishlari bo‘yicha Koson tumani sudi hukmi bilan ularning har biriga Maʼmuriy javobgarlik to‘g‘risidagi kodeksning 183-moddasi (mayda bezorilik) va 194-moddasi (Ichki ishlar organlari xodimining qonuniy talablarini bajarmaslik) 1-qismi bilan 10 sutkadan maʼmuriy qamoq jazosi tayinlandi.
Avvalroq Surxondaryoda 16 yoshli bola Gentrani Milliy gvardiya xodimi ustiga haydagani, YPXga tegishli Volkswagen Caddy va Lacetti ishtirokida yo‘l-transport hodisasi sodir bo‘lgani to‘g‘risida xabar berilgandi.
Izoh (0)