Қашқадарё вилояти Косон туманида йўлдан ўтиб кетаётган йўл-патрул хизмати ходимларини ҳақоратлаган шахслар жавобгарликка тортилди. Бу ҳақда “Миллар” информацион дастурида маълум қилинди.
Қайд этилишича, 4 нафар эркак йўлдан ўтиб кетаётган ЙПХ ходимларининг автомашинасини видеога олиб, ходимларни турли сўзлар билан ҳақорат қилган. Уларни онасидан сўкиб, видеони Telegram орқали турли гуруҳларга жўнатган.
“7 январь куни ўртоқларимиз билан йиғилдик. Спиртли ичимлик ичиб олгандик, кейин ташқарига чиқдик. Ўша вақтда маҳалламизнинг Telegram гуруҳига йўлдан ўтаётган ГАИ машинасига қараб ҳақоратли сўзлар ишлатдик. Ҳеч қандай ГАИ ходимларига адоватим йўқ. Ҳаммасидан узр сўрайман. Видеони ким тарқатди номаълум”, — дейди эркаклардан бири.
Судланувчиларнинг қолганлари ҳам маст ҳолатда бўлгани ва қилган ишидан пушаймонлигини билдирган.
Жиноят ишлари бўйича Косон тумани суди ҳукми билан уларнинг ҳар бирига Маъмурий жавобгарлик тўғрисидаги кодекснинг 183-моддаси (майда безорилик) ва 194-моддаси (Ички ишлар органлари ходимининг қонуний талабларини бажармаслик) 1-қисми билан 10 суткадан маъмурий қамоқ жазоси тайинланди.
Аввалроқ Сурхондарёда 16 ёшли бола Gentra’ни Миллий гвардия ходими устига ҳайдагани, ЙПХга тегишли Volkswagen Caddy ва Lacetti иштирокида йўл-транспорт ҳодисаси содир бўлгани тўғрисида хабар берилганди.
Изоҳ (0)