Toshkent viloyatida bojxonachilar O‘zbekiston hududiga pnevmatik qurolni noqonuniy olib kirilishiga chek qo‘ydi. Bu haqda viloyat Bojxona boshqarmasi xabar berdi.
Ma’lum qilinishicha, “Yallama” chegara bojxona post xodimlari tomonidan O‘zbekistonda faoliyat olib borayotgan masʼuliyati cheklangan jamiyatlardan birining nomiga kuryerlik jo‘natmalari bojxona nazoratidan o‘tkazilgan.
Tashkilotning ishonchli vakili hamda xolislar ishtirokida o‘tkazilgan tekshiruv davomida Mercedes-Benz Vito rusumli bo‘lgan avtotransport vositasiga yuklangan kuryerlik jo‘natmalari orasida hech qanday ruxsat beruvchi hujjatlari bo‘lmagan bir dona Stalker S84 nomli pnevmatik quroli, bir dona Quarta air strike nomli gaz baloni hamda 1 250 dona o‘q borligi aniqlangan.
Hozirda ushbu holat yuzasidan bojxona organlari tomonidan surishtiruv harakatlari davom etmoqda.
O‘zbekistonda quroldan foydalanish tartibi
O‘zbekistonda “Qurol to‘g‘risidagi” qonun 2019-yil 29-iyulda prezident tomonidan imzolangan. Fuqaroviy va xizmat quroli hamda uning o‘q-dorilarini ishlab chiqarish, ta’mirlash va realizatsiya qilish bo‘yicha faoliyat faqat O‘zbekiston hududida belgilangan tartibda ro‘yxatdan o‘tgan yuridik shaxslar tomonidan amalga oshiriladi. O‘zbekistonda noqonuniy saqlangan qurollarni o‘z ixtiyori bilan IIVga topshirganlarga pul mukofoti beriladi.
2022-yilda “Prokuratura to‘g‘risida”gi qonunga kiritilgan o‘zgartirishlarga ko‘ra, prokuratura organlari xodimlari xizmat quroli va shaxsiy himoya vositalarini qonunchilikda belgilangan tartibda saqlash, olib yurish hamda ulardan foydalanish huquqiga egaligi belgilangandi (ilgari faqatgina olib yurishi mumkinligi ko‘rsatilgan).
Izoh (0)