Давлат хавфсизлик хизматининг Самарқанд вилояти бўйича бошқармаси ходимлари томонидан ўқотар қуролни ноқонуний равишда сотмоқчи бўлган шахс ушланди.
Маълум қилинишича, Жомбой туманида ўтказилган тезкор тадбирда Тошкент шаҳрида яшовчи, муқаддам Жиноят кодексининг 251-1 ва 246-моддалари билан судланган 47 ёшли шахс харидорга 1 дона “Макаров” пистолети ва унинг 96 дона ўқ-дорисини 10 минг долларга сотмоқчи бўлган вақтида ашёвий далиллар билан қўлга олинган.
Шунингдек, унинг яшаш хонадонида ўтказилган тинтув ҳаракатлари давомида фойдаланишга яроқли деб топилган, калибри 5,6 миллиметр бўлган эски русумдаги “Монте Кристо” тўппончаси, турли хил гильзалар, ов милтиғи қисмлари, ўткир тиғли жисмлар ҳамда бошқа ашёвий далиллар процессуал тартибда расмийлаштириб олинган.
Ҳозирда мазкур шахсга нисбатан Жиноят кодексининг 248-моддаси (ўқотар қуролнинг, ўқ-дориларнинг, ўқотар қурол асосий қисмларининг, портловчи моддаларнинг, портлатиш воситаларининг ёки портлатиш қурилмаларининг қонунга хилоф муомаласи) 3-қисми билан жиноят иши қўзғатилиб, қамоққа олиш тарзидаги эҳтиёт чораси қўлланилган.
Аввалроқ “Яллама” чегара божхона пост ходимлари томонидан Ўзбекистонда фаолият олиб бораётган масъулияти чекланган жамиятлардан бирининг номига курьерлик жўнатмалари божхона назоратидан ўтказилганида унинг ичидан пневматик тўппонча чиққани тўғрисида хабар берилганди.
Изоҳ (0)