Turk banklari ommaviy ravishda Rossiya banklari bilan ishlashdan bosh tortyapti, deb yozmoqda “Kommersant” gazetasi moliya bozori va tashqi savdo ishtirokchilaridagi manbalarga tayanib.
Nashrga ko‘ra, turk banklari Rossiyaning deyarli barcha kredit tashkilotlari bilan korrespondentlik aloqalarini uzdi, shuningdek, shartnomalarni rasman yopmasdan, to‘lovlar bilan ishlashni to‘xtatdi. Gazeta manbalaridan biri turk banklari Rossiyadagi sho‘ba xorijiy banklar uchun istisno qilganini ta’kidladi.
“Kommersant” suhbatdoshlariga ko‘ra, vaziyat 2023-yilning yozida yanada murakkablashgan, AQSH prezidenti Jo Bayden 22-dekabr kuni Ukrainadagi urushda Rossiyaga yordam berayotgan xorijiy kompaniyalarga qarshi ikkilamchi sanksiyalar to‘g‘risidagi farmonni e’lon qilganidan keyin esa keskin yomonlashgan. Farmon AQSH hukumatiga Rossiyaga qarshi sanksiyalarni buzgan xorijiy banklarni Amerika moliya tizimidan uzib qo‘yish imkonini beradi.
KVT bojxona-logistika brokeri prezidenti Yuliya Shlenskayaning so‘zlariga ko‘ra, “Turkiyadagi banklar pauza olib, Rossiyadan va mamlakatga pul o‘tkazmalarini amalga oshirmayapti”.
SOTA Logistic biznesni rivojlantirish direktori Igor Chernishevning aytishicha, “xizmatlar uchun to‘lov ham qilib bo‘lmaydi”
“TASS”ning Turkiya banklari sohasidagi manbasi 16-yanvar kuni ma’lum qilishicha, turk banklari Bayden farmoni tufayli “kutish rejimida”, chunki farmondagi so‘zlar qo‘shimcha tushuntirishlar talab qiladi.
Bloomberg Xitoy davlat banklari ham Jo Baydenning ikkilamchi sanksiyalar haqidagi farmoni tufayli Rossiyadan kelgan mijozlar bilan ishlashni cheklayotganini xabar qildi. Unga ko‘ra, Xitoyning kamida ikkita banki Rossiyadagi biznesini qayta ko‘rib chiqishga, sanksiyaga duchor bo‘lgan mijozlar bilan aloqalarni uzishga, shuningdek, Rossiya harbiy sanoatiga har qanday moliyaviy xizmatlar ko‘rsatishni to‘xtatishga qaror qilgan. Kreml Bloomberg nashriga javoban Rossiya Xitoy bilan ikki tomonlama munosabatlarni rivojlantirishda davom etayotganini bildirdi.
Izoh (0)