Xitoy aholisini koronavirusga qarshi emlash mamlakatga 150 milliard yuanga (21,5 milliard dollar) tushdi, deb yozadi South China Morning Post Milliy sog‘liqni saqlash xavfsizligi boshqarmasi (NHSA) ma’lumotlariga tayanib.
Nashr yozishicha, vaksinaning bir dozasi o‘rtacha 16 yuan (1,24 dollar) turadi. Aksariyat hollarda odamlar Sinopharm davlat kompaniyasi va Sinovac xususiy kompaniyasi vaksinalari bilan emlangan.
Yana 4,3 milliard yuan koronavirus testlariga sarflangan. Nashrning qayd etishicha, bu miqdor 2022-yilning may oyidan buyon mahalliy budjetlar hisobidan amalga oshirilgani uchun mamlakatda testga sarflangan real summadan kam.
2022-yilning kuzidan boshlab Xitoy muntazam amalda bo‘lgan pandemiya cheklovlarini asta-sekin yumshata boshladi: kasallanganlar bilan aloqada bo‘lganlar uchun karantin muddati qisqartirildi; ommaviy PZR-testi bekor qilindi va hokazo.
Shu fonda virus tarqalishining qayta avj olishi haqida xabarlar paydo bo‘la boshladi. Dekabr oyi oxirida Financial Times Xitoy Kasalliklarni nazorat qilish va oldini olish markazi direktori o‘rinbosari Sun Yanga tayanib, cheklovlar olib tashlangandan keyingi oyning birinchi 20 kunida 250 millionga yaqin odam, ya’ni aholining deyarli beshdan bir qismi kasallanganini yozdi.
Bunday ma’lumotlar boshqa mamlakatlarda pandemiyaning yangi to‘lqini paydo bo‘lishidan xavotir uyg‘otdi. Ko‘plab davlatlar Xitoydan keluvchilar uchun talablarni kuchaytirishga qaror qildi. Masalan, AQSH yanvar oyida bunday odamlardan koronavirus testining manfiy natijasini talab qila boshladi, mamlakat bu chorani 10-martda bekor qildi.
Izoh (0)