2023 йилда Хитой аҳолиси 2,08 миллион кишига ёки 0,2 фоизга камайиб, 1,409 миллиардга тушди. Хитой Халқ Республикаси Давлат статистика бошқармасининг йиллик ҳисоботида маълум қилинишича, ўтган йили мамлакатда аввалги йилга нисбатан 5,7 фоизга кам бола туғилган: 9,02 миллион. Шу билан бирга, туғилиш рекорд даражада пастлигича қолмоқда — 1 000 кишига 6,39 та.
Ҳисоботда, шунингдек, 2023 йилда вафот этганлар сони 2022 йилга нисбатан 6,6 фоизга ошгани кўрсатилган. Ўтган йили мамлакатда 11,1 миллион киши вафот этди ва ўлим даражаси, яъни ҳар 1 минг аҳолига тўғри келадиган ўлим сони 7,87 ни ташкил этди, бу 1974 йилдан бери энг юқори кўрсаткичдир.
Аҳолининг табиий ўсиши 1 минг кишига минус 1,48 ни ташкил этган. Статистик маълумотларга кўра, Хитой аҳолисининг 720,3 миллионини эркаклар, 689,35 миллионини аёллар ташкил қилади. Аҳолининг энг катта улушини 16 ёшдан 59 ёшгача бўлганлар – 61,3 фоиз ёки 864,8 миллион киши ташкил этади. Йил давомида шаҳарлар аҳолиси 11,96 миллионга ошиб, 932,67 миллионга етган, қишлоқ жойларда доимий аҳоли сони эса 14,4 миллион кишига камайиб, 477 миллионга тушган.
Хитой аҳолиси кетма-кет иккинчи йил камайиб бормоқда
2022 йилда 1961 йилдан буён биринчи марта аҳоли сонида қисқариш қайд этилганди. 2023 йилда туғилишни ошириш бўйича миллий ва минтақавий ҳокимият органлари томонидан кўрилган кўплаб чора-тадбирлар сезиларли натижаларни бермади. Аввалроқ Хитой Фанлар академияси томонидан эълон қилинган прогнозда агар туғилишнинг ҳозирги паст тенденцияси давом этса, 2035 йилга келиб мамлакат пенсия тизими маблағсиз қолиши айтилган. Ўша пайтга келиб, 60 — пенсия ёшидан ошганлар 280 миллиондан 400 миллионга кўтарилади.
Хитойдаги айрим экспертлар туғилиш даражаси 2024 йилда кўтарилиши мумкин, деб умид қилмоқда, чунки COVID-19 пандемиясининг тугаши тегишли бумни келтириб чиқариши керак. Бундан ташқари, Хитойда анъанавий равишда Аждаҳо йилида кўпроқ болалар туғилади, деб хабар бермоқда баъзи Хитой оммавий ахборот воситалари.
Изоҳ (0)