Namanganda qariyb 80 mln rublni Qirg‘izistonga olib o‘tmoqchi bo‘lgan shaxs qamoqqa olindi (video)

Namanganda qariyb 80 million Rossiya rublini Qirg‘izistonga o‘tkazmoqchi bo‘lgan shaxs ushlandi.

DXXning Namangan viloyati bo‘yicha boshqarmasi xodimlari tomonidan o‘tkazilgan tezkor tadbirda juda ko‘p miqdordagi xorijiy valyutalarni noqonuniy ravishda Qirg‘izistonga o‘tkazmoqchi bo‘lgan shaxs qo‘lga olindi.

Qirg‘izistonning Jalolobod viloyati Olabuqa tumani bilan chegaradosh bo‘lgan Namangan viloyatining Yangiqo‘rg‘on tumani hududidan o‘tuvchi o‘zbek-qirg‘iz davlat chegarasi tomon harakatlanayotgan, Namangan shahrida yashovchi, 1990-yilda tug‘ilgan fuqaro boshqaruvidagi Lacetti to‘xtatilib, ko‘zdan kechirilganda, uning salonida uch dona polietilen qoplarga joylashtirilgan jami 79 million 994 ming 900 rubl borligi aniqlangan.

Ma’lum bo‘lishicha, ushbu shaxs pullarni chegaradan o‘tkazib berishi evaziga 300 dollar olishi kerak bo‘lgan.

Holat yuzasidan mazkur fuqaroga nisbatan Jinoyat kodeksining 25,182-moddasi 2-qismi “a” bandi bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.