Bojxonachilar Toshkent xalqaro aeroportida 1,8 milliard so‘mlik olmoslarni olib kirishga uringan shaxslarni to‘xtatib qoldi. Bu haqda Davlat bojxona qo‘mitasi matbuot xizmati xabar berdi.
Qayd etilishicha, Toshkent xalqaro aeroportida Dehlidan uchib kelgan yo‘lovchining paltosi cho‘ntagidan 281 qirot hajmdagi olmos qimmatbaho toshlari topilgan.
Toshkent xalqaro aeroporti chegara-bojxona posti xodimlari tomonidan fosh qilingan mazkur holatda yo‘lovchi bojxona nazoratiga taqdim etmagan olmoslarning umumiy qiymati dastlabki hisob-kitoblarga ko‘ra 873 million so‘mdan oshmoqda.
Hindistondan uchib kelgan yana bir yo‘lovchining bagajini ko‘zdan kechirish davomida ushbu xorijiy fuqaro ham 57 dona turli o‘lchamdagi olmos toshlarini yashirincha olib kirishga uringani fosh bo‘lgan.
Bojxona nazoratiga taqdim qilinmagan qimmatbaho toshlarning qiymati dastlabki hisob-kitoblarga ko‘ra 942 million so‘mdan oshmoqda.
Ma’lumot uchun, respublika bojxonachilari 2023-yilda aniqlangan 394 ta bojxona qonunbuzilishi holatlarida 32,4 milliard so‘mlik 163 kilogramm zargarlik buyumlari, shu jumladan, qimmatbaho toshlarning bojxona chegaralari orqali noqonuniy olib o‘tilishining oldini olgan.
Aprel o‘rtalarida Hindistonda Indira Gandi aeroportidan 3,2 kilogramm oltinni noqonuniy olib o‘tmoqchi bo‘lgan o‘zbekistonlik erkak ushlangan edi. O‘zbekiston fuqarosi Dubay reysini amalga oshirish uchun Chandigarh aeroportiga qochib ketgan payti qo‘lga tushgan.
Izoh (0)